Abakozi 26 baturutse mu nzego z’umutekano n’iperereza zinyuranye mu Rwanda, zirimo RDF, Urwego rw’Igihugu rw’Ubutasi n’Umutekano (NISS), n’Urwego rw’Igihugu rw’Ubugenzacyaha (RIB), basoje amahugurwa y’ibyumweru bine ku micungiro y’Urwego rw’Ingabo.
Aya mahugurwa yasojwe kuri uyu wa Kane tariki 23 Nyakanga 2026 nk’uko byatangajwe na Minisiteri y’Ingabo mu Rwanda.
MINADEF yatangaje ko aba bakozi 26 barimo abo muri iyi Minisiteri, iy’Ububanyi n’Amahanga (MINAFFET), Ingabo z’u Rwanda (RDF), Urwego rw’Igihugu rw’Ubugenzacyaha (RIB), Polisi y’u Rwanda (RNP), Urwego rw’Igihugu rushinzwe Igorora (RCS), ndetse n’Urwego rw’Igihugu rw’Ubutasi n’Umutekano (NISS).
Minisiteri Iyi Ngabo yatangaje ko aba bakozi bo muri izi nzego “basoje amahugurwa y’ibyumweru bine ku Micungire y’Urwego rw’Ingabo yabereye mu Ishuri ryigisha ba Ofisiye Bakuru, mu Karere ka Musanze.”
Ikomeza igira iti “Aya mahugurwa yari agamije kongerera abayahuguwemo ubumenyi n’ubushobozi mu buyobozi, igenamigambi, imicungire y’umutungo, no gufata ibyemezo, hagamijwe guha abasirikare n’abakora mu rwego rw’ingabo ubushobozi bukenewe bwo gucunga neza inzego z’ingabo n’ibikorwa byazo.”
Ni muri gahunda itegura aba bakozi gucunga neza inzego z’ingabo, ibikorwa bya gisirikare, n’umutungo haba mu bihe by’amahoro ndetse no mu bihe by’intambara.
Aya mahugurwa yahabwaga aba bakozi, yari aya gatatu mu ruhererekane rw’amahugurwa yo ku rwego rw’ubuyobozi bukuru yateguwe n’Ishuri Rikuru ry’ Ingabo z’u Rwanda ku bufatanye n’Ikigo cy’Umuryango w’Abibumbye gishinzwe Amahugurwa n’Ubushakashatsi (UNITAR).
RADIOTV10