Guverinoma y’u Rwanda n’iya Togo zashyize umukono ku masezerano atatu agamije gukomeza ibiganiro bya politiki no kwagura ubufatanye hagati y’Ibihugu byombi.
Aya masezerano yashyiriweho umukono i New York muri Leta Zunze Ubumwe za America, mu bikorwa by’Inteko Rusange ya 81 y’Umuryango w’Abibumbye, nyuma y’inama y’Ibihugu byombi yahuje Minisitiri w’Ububanyi n’Amahanga n’Ubutwererane w’u Rwanda, Olivier Nduhungirehe, na Minisitiri w’Ububanyi n’Amahanga, Ubutwererane, Ubumwe bwa Afurika n’Abanya-Togo baba mu mahanga, Prof. Robert Dussey.
Aya masezerano arimo ay’ubwumvikane ku biganiro bya politiki, Amasezerano y’ubwumvikane ashyiraho Komisiyo ihuriweho ishinzwe ubufatanye, ndetse n’Amasezerano y’Ingengabihe y’Ubufatanye hagati y’ibihugu byombi.
Aya masezerano ashyizweho umukono nyuma y’ibikorwa bitandukanye bya dipolomasi n’ubukungu byaranze umubano w’u Rwanda na Togo mu 2026.
Muri Mutarama 2026, Minisitiri Olivier Nduhungirehe na Prof. Robert Dussey bashyize umukono i Lomé ku masezerano akuraho ibisabwa kuri viza ku baturage b’Ibihugu byombi bafite pasiporo z’ubwoko bwose.
Iyi gahunda yari igamije koroshya ingendo hagati y’u Rwanda na Togo, ndetse no guteza imbere umubano mu by’ubukungu n’imikoranire hagati y’abaturage b’ibihugu byombi.
Ubufatanye kandi bwakomeje mu bijyanye n’ubucuruzi n’ishoramari. Muri Gicurasi, Minisitiri w’Ubucuruzi n’Inganda w’u Rwanda, Prudence Sebahizi, yagiranye ibiganiro na Perezida w’Inama ya Togo, Faure Gnassingbé, mu nama ya Biashara Africa yabereye i Lomé.
Nk’uko byatangajwe na Perezidansi ya Togo, ibiganiro byabo byibanze ku mahirwe yo guteza imbere ubucuruzi n’ibikorwa by’ubucuruzi hagati y’ibihugu byombi, harimo kongera agaciro ku musaruro no kohereza hanze ibikomoka ku buhinzi.
Muri Kamena 2026, Perezida w’u Rwanda Paul Kagame na we yagiriye uruzinduko rw’akazi muri Togo, aho yari yitabiriye ibikorwa bijyanye n’Inama n’Imurikabikorwa ku Gutwara Abagenzi mu Ndege muri Afurika.
Guverinoma ya Togo yatangaje ko muri urwo ruzinduko Perezida Kagame yagiranye ibiganiro na Perezida Faure Gnassingbé ku bibazo bihuriweho n’ibihugu byombi ndetse n’ibireba umugabane wa Afurika muri rusange.
Aya masezerano atatu yasinyiwe i New York aje gukomeza ibikorwa by’ubufatanye byari bisanzwe bikorwa hagati ya Kigali na Lomé, birimo amasezerano yo gukuraho viza, ibiganiro ku bucuruzi n’ishoramari ndetse n’imikoranire yo ku rwego rwo hejuru yakomeje hagati y’ibihugu byombi muri uyu mwaka.
RADIOTV10