Monday, November 16, 2026
RW|EN
AMAHANGA

Havumbuwe ikibuye kiri kuzenguruka mu isanzure cyatumye hatahurwa izindi mbaraga zidasanzwe z’Isi

Havumbuwe ikibuye kiri kuzenguruka mu isanzure cyatumye hatahurwa izindi mbaraga zidasanzwe z’Isi

Abahanga mu bumenyi mu by’isanzure bavumbuye urutare ruto rwo mu kirere rwafashwe n’imbaraga rukuruzi z’Isi, ruri kuzenguruka uyu mubumbe nk’ukwezi, ruzakomeza kuwuzenguruka kugeza muri Mutarama 2027.

Uru rutare rwahawe izina rya 2026 QQ6, rufite ubunini bungana na metero ebyiri z’umurambararo. Rwinjiye mu nzira izenguruka Isi muri Mata 2026, nyuma yo gutembera mu isanzure.

Abahanga bavuga ko nubwo uru rutare ari ruto cyane ku buryo rudashobora kugaragara hifashishijwe ibyuma bisanzwe byifashishwa n’abakunda kwitegereza inyenyeri, rufite agaciro mu bushakashatsi bugamije gusobanukirwa uburyo Isi ishobora gufata utubuye two mu isanzure tukayizenguruka mu gihe gito.

Icyakora, uru rutare nta kaga ruteje Isi. Abashakashatsi bavuga ko nubwo urutare ruto nk’uru rushobora gushwanyagurika rukangirika mu kirere iyo rwegereye cyane Isi, muri uru rugendo ruzagera hafi yayo ku ntera y’ibirometero ibihumbi 568, ni ukuvuga inshuro hafi imwe n’igice z’intera iri hagati y’Isi n’ukwezi.

Biteganyijwe ko muri Mutarama 2027, uru rutare ruzava mu mbaraga rukuruzi z’Isi, rugakomeza urugendo rwarwo mu isanzure.

 

Abashakashatsi babanje kutumvikana ku nkomoko yarwo

Uru rutare rwavumbuwe bwa mbere muri Kanama 2026 n’Umuhanga mu bumenyi bw’ikirere ukomoka muri Hongiriya, Krisztián Sárneczky, uzwiho kuvumbura ibindi bintu bitandukanye bizenguruka mu isanzure.

Igihe iyi nzobere yagezaga ibyavuye mu bushakashatsi bwe ku Kigo Mpuzamahanga cy’Abahanga mu Bumenyi bw’Isanzure gishinzwe kwandika no kwemeza imibumbe mito n’utundi duce two mu isanzure (Minor Planet Center), abahanga ntibahise bumvikana ku cyo icyo kintu ari cyo.

Hari abatekerezaga ko ari urutare rusanzwe rwo mu isanzure rwafashwe n’imbaraga rukuruzi z’Isi mu gihe gito, mu gihe abandi bakekaga ko ari ibisigazwa by’ibikoresho byakozwe n’abantu byazengurukaga mu isanzure.

Mu itangazo ryacyo, Minor Planet Center yavuze ko “Ikintu cyiswe Sar2901 gifite inzira y’urugendo ishobora kugaragaza ko ari ukwezi kw’agateganyo cyangwa ikintu cyakozwe n’abantu. Abahanga muri rusange ntibumvikana ku gisobanuro gishoboka kurusha ibindi.”

Prof. Avi Loeb wo muri Kaminuza ya Harvard muri Leta Zunze Ubumwe za Amerika, inzobere mu bugenge bw’isanzure n’inyenyeri, na we aherutse kuvuga ko icyo kintu gishobora kuba ari agace k’igikoresho cyatakaye mu rugendo rw’icyogajuru Apollo 13 cyari kigamije kujya ku Kwezi.

Gusa nyuma y’ubundi bushakashatsi bwakozwe hifashishijwe icyuma gikomeye cyo kureba isanzure cya Lowell Discovery Telescope muri Arizona no mu kindi cya metero 2,2 cya Kaminuza ya Hawaii, byemejwe ko icyo kintu gifite inkomoko karemano, atari ibisigazwa by’ibikoresho byakozwe n’abantu.

Abahanga mu bumenyi bw’ikirere bakomeje gukurikirana urugendo rw’uru rutare kugira ngo barusheho gusobanukirwa uko Isi ishobora gufata utundi duce duto two mu isanzure tukayizenguruka by’igihe gito.

RADIOTV10

Sangira: Facebook Twitter WhatsApp

Leave a Reply

Your email address will not be published. Required fields are marked *

one + seventeen =