Abasirikare 66 bo mu ngabo za Repubulika Iharanira Demokarasi ya Congo (FARDC) bakatiwe igihano cy’urupfu n’Urukiko rwa Gisirikare rwa Goma, nyuma yo guhamwa n’ibyaha birimo gutoroka urugamba, kwigomeka mu gisirikare no kutubahiriza amabwiriza y’abayobozi babo.
Ibi bihano byatangiwe mu rubanza rwabereye mu Mujyi wa Walikale Centre, mu Ntara ya Kivu y’Amajyaruguru. Abakatiwe bari mu basirikare 71 bashinjwaga kuva ku birindiro byabo bagahunga mu mirwano ikomeye bahanganyemo n’abarwanyi b’umutwe wa FRN wahoze uzwi nka M23/AFC.
Muri abo basirikare, 54 bafashwe ku wa 20 Ukwakira 2026 i Ngora, bakurikiranyweho ibyaha bivugwa ko byakorewe mu gace ka Waloa Uroba, muri Sheferi ya Wanianga, muri Teritwari ya Walikale. Abandi 17 bo bafashwe nyuma.
Bafashwe nyuma yo kuva ku birindiro byabo bagahunga mu mirwano bahanganyemo n’abarwanyi ba FRN. Umuvugizi w’Itumanaho mu Karere ka 34 ka Gisirikare ka FARDC, Maj. Dieudonné Kasereka, yavuze ko bashinjwaga ibyaha bitatu by’ingenzi: gutoroka urugamba, kwigomeka mu gisirikare no kwanga kubahiriza amabwiriza.
Kasereka yavuze ko Ubushinjacyaha bwari bwasabiye igihano cy’urupfu abasirikare 70 muri 71, mu gihe umusirikare ushinzwe ubutasi mu gisirikare yari yasabiwe igifungo cy’imyaka 10.
Gusa, nyuma yo kuburanishwa, 66 muri bo ni bo bakatiwe urwo gupfa. Serija umwe, amazina ye atatangajwe, yagabanyirijwe uburemere bw’igihano kubera impamvu zoroheje zagaragajwe mu rubanza, akatirwa imyaka 10 y’imirimo y’agahato.
Abandi bane bagizwe abere, barimo kapiteni wari ushinzwe ubutasi mu mutwe wa 3415 wa FARDC.
Kasereka yavuze ko ibyo bihano biri mu ngamba zo kongera ikinyabupfura mu ngabo za Congo, mu gihe ibikorwa bya gisirikare byo guhangana n’imitwe yitwaje intwaro bikomeje mu burasirazuba bw’icyo gihugu.
Si ubwa mbere abasirikare ba FARDC bahabwa ibihano bikomeye kubera ibyaha bifitanye isano no gutoroka urugamba. Muri Gicurasi 2026, abasirikare 58 bakatiwe igifungo cy’imyaka itatu n’urukiko rwa gisirikare rwabereye i Kisangani, nyuma yo guhamwa n’icyaha cyo kuva ku birindiro bagahunga mu gihe abarwanyi ba FRN/M23 bari bagabye ibitero muri Teritwari ya Walikale.
Muri Nyakanga 2024, abandi basirikare 25 ba FARDC bakatiwe urwo gupfa nyuma yo guhamwa n’icyaha cyo guhunga umwanzi, ubwo abarwanyi ba M23/AFC bari bamaze kwigarurira uduce dutandukanye two muri Teritwari ya Lubero, turimo Miriki, Kimaka, Luofu, Kayna n’ikigo cya gisirikare cya FARDC kiri i Kasando, hafi y’ibilometero bine uvuye mu Mujyi wa Kirumba.
Muri Werurwe 2025 na bwo, abasirikare 55 ba FARDC bakatiwe urwo gupfa bazira guhunga umwanzi no gusahura imitungo y’abaturage muri Teritwari ya Lubero, mu Ntara ya Kivu y’Amajyaruguru.
Ibi bihano bishya bije mu gihe imirwano hagati y’ingabo za Leta ya Congo n’abarwanyi ba FRN ikomeje mu bice bitandukanye byo mu burasirazuba bw’icyo gihugu.
Ku Cyumweru, tariki ya 8 Ugushyingo 2026, abarwanyi ba FRN/M23 bigaruriye agace ka Bunyakiri Centre, muri Teritwari ya Kalehe, mu Ntara ya Kivu y’Amajyepfo, nyuma yo kwirukana abasirikare ba FARDC n’abarwanyi ba Wazalendo bafatanya na bo.
Amashusho yashyizwe hanze n’abarwanyi ndetse n’abaturage yagaragazaga abarwanyi ba FRN bari muri ako gace nyuma y’uko bivuzwe ko bakigaruriye.
RADIOTV10