Abanyeshuri biga mu Ishuri Rikuru ry’Ingabo z’u Rwanda rishinzwe amahugurwa y’aba Ofisiye bakuru (RDFSCSC), basuye ibice bibumbatiye amateka y’urugamba rwo Kwibohora birimo Kagitumba aho rwatangirijwe, banagarizwa n’abajenerali bari barurimo, barimo General (Rtd) Fred Ibingira.
Ni mu rugendo shuri batangiye kuri uyu wa Gatatu tariki 22 Mata 2026, aho aba banyeshuri bagize icyiciro cya 14, batangiye gusobanurirwa amateka y’urugamba rwo Kubohora igihugu bikozwe n’Ingabo za RPA.
Uru rugendoshuri ruteguwe kuva taliki 22 kugeza 24 Mata 2026, rugamije gusobanukirwa uko ingabo za RPA zabohoye u Rwanda mu maboko y’ubuyobozi bubi nuko zahagaritse Jenoside yakorewe Abatutsi mu 1994.
Ubuyobozi Bukuru bw’Ingabo z’u Rwanda, buvuga ko “Uru rugendo rwatangiriye ku mupaka wa Kagitumba, aho abanyeshuri bahawe ibiganiro n’abajenerali b’Ingabo z’u Rwanda n’abandi ofisiye bakuru bagize uruhare mu rugamba rwo kubohora Igihugu.”
RDF ivuga ko inyigisho nk’izi ziba zigamije gufasha abanyeshuri kurushaho gusobanukirwa imipangire y’intambara ni uko abayirwana bashyira mu bikorwa bityo bikabaviramo amasomo abafasha mu kazi ka gisirikare.
Mu Bajenerali baganirije aba banyeshuri, barimo General (Rtd) Fred Ibingira uri mu basirikare b’iyahoze ari RPA bari bayoboye abandi mu rugamba rwo Kwibohora.
Gen (Rtd) Fred Ibingira azwiho kuba yarayoboye batayo zinyuranye z’ingabo za RPA (Rwanda Patriotic Army) ku rugamba rwo kubohora u Rwanda, ariko Batayo ya 157 ni yo yamenyekanyeho cyane, aho yayoboye abasirikare mu guhagarika Jenoside yakorewe Abatutsi mu 1994.
RADIOTV10
