Amakipe ane yose yageze muri 1/2 cy’irangiza mu irushanwa rikomeye ku Mugabane w’u Burayi rinakurikirwa na benshi ku Isi rya UEFA Champions League, yose yagiranye imikoranire n’u Rwanda muri gahunda ya Visit Rwanda.
Aya makipe; ni Arsenal FC yo mu Bwongereza, Paris Saint Germain yo mu Bufaransa, Atlético Madrid yo muri Espagne, ndetse na FC Bayern Munich yo mu Budage.
Ku ikubitiro ayabanje gukatisha itike yo kwerecyeza muri 1/2 cy’irangiza muri UEFA Champions League mu mikino yabaye ku wa Kabiri, ni; Atlético Madrid yasezereye FC Barcelona iyitsinze ku giteranyo cy’ibitego 3-2 mu mikino ibiri, ndetse na Paris Saint Germain yasezereye Liverpool ku giteranyo cy’ibitego 4-0.
Mu ijoro ryo kuri uyu wa Gatatu, bwo amakipe yabone itike ya 1/2 ni Arsenal yo yayibonye isezereye Sporting CP yo muri Portugal iyitsinze igitego 1-0 cyabonetse mu mukino wabanje, ndetse na FC Bayern Munich yasezereye Real Madrid ku giteranyo cy’ibitego 6-4 birimo 4 yatsinze mu mukino wa nijoro.
Aya makipe yose uko ari ane, asanzwe akorana n’u Rwanda mu kwamamaza ubukerarugendo bwarwo muri gahunda izwi nka Visit Rwanda, yabimburiwe na Arsenal byatangiranye masezerano yatangiye mu mwaka wa 2018 akagenda yongerwa ariko akaba azarangira mu mpeshyi y’uyu mwaka, akaba atazanongerwa nk’uko byamaze gutangazwa.
Perezida wa Repubulika y’u Rwanda, Paul Kagame wari wabanje gushimira amakipe abiri yari yabanje kwinjira muri 1/2 (PSG na Atlético Madrid), yari yagize ati “Turashimira cyane umufatanyabikorwa wa Visit Rwanda Paris Saint-Germain ku bwo kubona itike yo kugera muri kimwe cya kabiri cya UEFA. Yakinnye neza kandi yari ikwiriye umusaruro mwiza! Tubifurije ibyiza byinshi mu cyiciro gikurikira!”
Yari yakomeje agira ati “Turashimira kandi umufatanyabikorwa uheruka wa Visit Rwanda mu mupira w’amaguru Atlético de Madrid ku ntsinzi ikomeye no kubona itike yo kugera muri kimwe cya kabiri cya UEFA! Tubifurije gukomeza gutsinda!”
Mu ijoro ryacyeye kandi ubwo andi makipe abiri na yo akorana n’u Rwanda yari amaze kubona na yo itike ya 1/2, Perezida Kagame na bwo yayashimiye.
Yagize ati “Twishimiye kubona abafatanyabikorwa batatu ba Visit Rwanda berekeza muri kimwe cya kabiri cya UEFA Champions League! Imikinire ya Atlético de Madrid, Arsenal
Na PSG yagaragaje ukutagamburuzwa, ubuhanga n’umurava, kandi dutegereje imikino iri imbere!”
Umukuru w’u Rwanda usanzwe ari umufana ukomeye w’ikipe ya Arsena, yayishimiye byumwihariko, avuga ko ategereje kuzabona yitwara neza mu gushaka itike yerecyeza ku mukino wa nyuma w’iri rushanwa rya UEFA Champions League.
RADIOTV10
