Mu bice biri mu nkengero y’agace ka Rubaya muri Teritwari ya Masisi mu Ntara ya Kivu ya Ruguru, haramukiye imirwano ikomeye hagati y’abarwanyi b’Ihuriro AFC/M23 n’uruhande rwa Leta ya Repubulika Iharanira Demokarasi ya Congo.
Abatuye mu bice biri hafi ya Rubaya, baravuga ko iyi mirwano yaramukanye imbaraga kuva mu gitondo cyo kuri uyu wa Gatanu, ahumvikana urusaku rw’imbunda zirimo iza rutura ndetse n’izoroheje.
Umwe mu bo mu miryango itari iya Leta ikorera muri Teritwari ya Masisi, aravuga ko kuva mu gitondo cya kare kuri uyu wa Gatanu, “haramutse imirwano ikarishye hafi y’agace ka Kinigi na Kavuta.”
Ni imirwano iri kubera mu bilometero bitari byinshi uvuye mu gace ka Rubaya, gakungahaye ku mabuye y’agaciro, kababaje ubutegetsi bwa Congo, bwakunze kugaba ibitero bigamije kukisubiza bikananirana.
Uwitwa Ramadhani Kakule wo muri iyi Miryango itari iya Leta ikorera i Masisi, yemeza ko iyi mirwano yo mu bice byegereye Rubaya, atari iya none kuko “imaze ibyumweru bibiri, aho barwana, bagahagarara, bakongera bagasubukura imirwano, gutyo gutyo.”
Avuga kandi ko iyi mirwano imaze gutuma abantu benshi bava mu byabo bagahunga, kandi ko Sosiyete sivile yo muri aka gace, yiteguye ko “hari abandi benshi bahunga uyu munsi.”
Iyi mirwano kandi ikomeje guhindura isura muri Kivu ya Ruguru, mu gihe uruhande rwa Leta ya Kinshasa rwanakajije umurego mu bitero rukoreshamo indege zitagira abapilote muri Kivu y’Epfo, birimo guhitana inzirakarengane nyinshi.
Ni mu gihe impande zombi zikomeje kotswa igitutu zisabwa kubahiriza agahenge kemeranyijweho, aho ubuyobozi bwa AFC/M23 budahwema kugaragariza Umuryango Mpuzamahanga ko uruhande bahanganye rwamaramaje rwanze kubahiriza agahenge.
Iri Huriro kandi rivuga ko nubwo ryiyemeje kubahiriza agahenge, ariko ridashobora kurebera mu gihe uruhande bahanganye rukomeje kwica inzirakarengane z’Abanyekongo, ahubwo ko rigomba gufata inshingano zo kurwana ku baturage b’abasivile nk’uko ryabyiyemeje.
RADIOTV10
