Minisitiri w’Intebe Wungirije wa Repubulika Iharanira Demokarasi ya Congo, akaba anashinzwe Ingabo, yasuye u Burundi agirana ibiganiro na mugenzi we w’iki Gihugu; byibanze ku kongerera ingufu imikoranire mu bya gisirikare.
Uru ruzinduko rwa Guy Kabombo Muadiamvita yagiriye mu Mujyi wa Gitega abanje gusura Umujyi wa Uvira muri Kivu y’Epfo wegereye uwa Bujumbura mu Burundi.
Uru ruzinduko rwari rugamije kongerera imbaraga imikoranire mu bya gisirikare hagati y’Ibihugu byombi, u Burundi na Repubulika Iharanira Demokarasi ya Congo, bisanzwe bikorana mu bikorwa bya gisirikare byo guhangana n’Ihuriro AFC/M23.
Guy Kabombo Muadiamvita yakirwe na mugenzi we Minisitiri w’Ingabo mu Burundi, Marie Chantal Nijimbere, bagirana ibiganiro byabereye mu muhezo.
Ikinyamakuru SOS Media Burundi kivuga ko ibi biganiro byahuje abayobozi ku mpande, byibanze ku bibazo by’umutekano wambukiranya imipaka y’ibi Bihugu bihana imbibi, ndetse no ku bibazo by’umutekano biri mu karere, ndetse n’ingingo irebana n’uburyo bwo kongerera imbaraga imikoranire mu bya gisirikare hagati y’u Burundi na Repubulika Iharanira Demokarasi ya Congo.
Iyi mikoranire isanzwe iri hagati y’ibi Bihugu byombi, ishingiye kumasezerano y’ubufatanye mu bya gisirikare yashyizweho umukono tariki 06 Werurwe 2023.
U Burundi na DRC, bisanganywe imikoranire mu bya gisirikare by’umwuhariko mu rugamba rwo guhangana n’Ihuriro AFC/M23 mu burasirazuba bwa DRC.
U Burundi bumaze kohereza ingabo zibarirwa mu bihumbi 30 muri Congo, bushinjwa kurenga ku masezerano y’amahoro yagiye asinywa hatati y’impande zirebwa n’ibibazo biri mu burasirazuba bwa DRC.
Ihuriro AFC/M23 zashinje kenshi ingabo z’u Burundi zifatanyije na FARDC ndetse n’imitwe nka FDLR na Wazalendo kugaba ibitero mu bice bigenzurwa n’iri hururo ndetse no mu bice bituyemo Abanyekongo bavuga Ikinyarwanda byumwihariko abo mu bwoko bw’Abatutsi.
RADIOTV10
