Urukiko Rwisumbuye rwa Nyarugenge rwashyikirijwe ubujurire bw’Ubushinjacyaha ku cyemezo cyafatiwe rwa Shema Arnaurd De Bosscher uzwi nka DJ Toxxyk, wahamijwe ibyaha akurikiranyweho ariko agafungurwa kuko yahawe ibihano bitarimo igifungo cyari cyasabwe n’Ubushinjacyaha, runagena itariki yo kuzaburanishirizaho ikirego cy’ubujururire.
DJ Toxxyk yari yasomewe umwanzuro n’Urukiko rw’Ibanze rwa Nyarugenge, rwamuhamije ibyaha ariko rumukatira igihano cyo gukora imirimo ifitiye Igihugu akamaro mu gihe cy’amezi atatu ariko asubitse mu gihe cy’amezi atandatu, ndetse gutanga ihazabu ya miliyoni 1,5 Frw.
Ni icyemezo kitanyuze Ubushinjacyaha bwahise butanga ubujurire bw’iki cyemezo tariki 06 Gicurasi mu Rukiko Rukiko Rwisumbuye rwa Nyarugenge, ndetse rukaba rwacyakiriye none kuri uyu wa Gatatu tariki 13 Gicurasi 2026.
Nyuma yuko Urukiko Rwisumbuye rwa Nyarugenge rwakiriye ikirego cy’ubujurire bw’Ubushinjacyaha, rwahise runagena itariki yo kuzakiburanisha, rukazaba kuri uyu wa Gatanu tariki 15 Gicurasi 2026.
Urukiko rw’Ibanze rwa Nyarugenge rwari rwahamije uyu muvangamiziki ibyaha bine birimo icyo kwica umuntu atabigambiriye, icyaha kijyanye no gukoresha ibiyobyabwenge, ndetse n’icyaha cyo guhunga ahabereye impanuka.
Mu iburanisha ryo mu mizi ryabaye tariki 20 Mata 2026, Ubushinjacyaha bwari bwasabye Urukiko rw’Ibanze rwa Nyarugenge guhamya DJ Toxxyk, rukamuhanisha igifungo cy’imyaka ibiri n’ihazabu ya miliyoni 1 Frw.
RADIOTV10
