Uruhande rwa Leta ya Repubulika Iharanira Demokarasi ya Congo, rurashinjwa gukomeza kurasa ibisasu mu bice bituwemo n’Abanyekongo b’Abanyamulenge muri Minembwe, ahagaragaje indege yo mu bwoko bwa Sukhoï-25 yagendaga imisha ibisasu ahantu hanyuranye.
Amashusho dukesha ikinyamakuru Kivu Info 24 yagiye hanze kuri uyu wa Gatanu tariki 10 Mata 2026, agaragaza iyo ndege yo mu bwoko bwa Sukhoï-25 igenda irasa ibisasu muri kariya gace gatuwemo b’Abanyekongo b’Abanyamulenge.
Iki kinyamakuru cyatangaje ko “Indege y’intambara ya Sukhoi-25 yazengurutse muri Minembwe hafi ya yose igenda irasira ibisasu mu kirere.”
Iki kinyamakuru kivuga ko ubwoba n’impungenge bikomeje kuba byose mu baturage b’abasivile batuye muri aka gace gakomeje kugaragaramo ibitero by’uruhande rwa Leta ya Kinshasa.
Lawrence Kanyuka, Umuvugizi w’Ihuriro AFC/M23 rirwanya ubutegetsi bwa DRC, yatangaje ubutegetsi bwa kiriya Gihugu, butitaye ku biganiro byari bitegerejwe i Burayi, ahubwo bugakomeza kwica inzirakarengane.
Na we kuri uyu wa Gatanu, Kanyuka yatangaje ko “Mu gihe intumwa za AFC/M23 zitabiriye ibiganiro bitegerejwe mu Busuwisi, ubutegetsi bwa Kinshasa bukomeje kwirengagiza inzira y’amahoro nk’uko bwakomeje kubigenza inshuro nyinshi.”
Yakomeje avuga ko “Kuri uyu wa Gatanu, tariki ya 10 Mata 2026, saa munani n’igice z’umugoroba, indege y’intambara ya Sukhoi-25 y’ubutegetsi bwa Kinshasa yarashe ibisasu mu buryo butaziguye kuri Minembwe no mu duce tuyikikije, bitera impfu z’abantu benshi ndetse binatuma abaturage b’inzirakarengane bava mu byabo.”
Kanyuka yavuze ko iki gitero kidakwiye gufatwa nk’icy’ubushotoranyi gusa, ahubwo ko gishimangira ko ubutegetsi bwa Kinshasa butitaye ku byo bwiyemeje, ndetse bukaba bukomeje kugaragaza ko butitaye ku buzima bw’abaturage, bukaba butanifuza ko ibibazo bibonerwa umuti binyuze mu nzira z’amahoro.
RADIOTV10
