Tuesday, November 17, 2026
RW|EN
IMYIDAGADURO

Hatangajwe undi muhanzi w’ikirangirire mu Rwanda uzahurira mu gitaramo gitegerejwe n’amatsiko

Hatangajwe undi muhanzi w’ikirangirire mu Rwanda uzahurira mu gitaramo gitegerejwe n’amatsiko

Umuhanzi Tom Close yongewe ku rutonde rw’abazataramira abakunzi ba muzika mu gitaramo cya BK60 kizahuza abahanzi bakomeye mu Rwanda barimo Bruce Melodie, Butera Knowless, Riderman, Tuff Gang na Active, mu rwego rwo kwizihiza imyaka 60 Bank of Kigali imaze ishinzwe.

Banki ya Kigali (BK) yatangaje ko Tom Close azitabira iki gitaramo ibinyujije ku mbuga nkoranyambaga zayo. Giteganyijwe kubera muri BK Arena i Kigali ku wa 5 Ukuboza 2026, kikaba kiri muri gahunda z’ibirori byo kwizihiza imyaka 60 iyi banki imaze ikorera mu Rwanda.

Mu butumwa yashyize kuri Instagram ifatanyije na Tom Close, Banki ya Kigali yagize iti: “Tom Close aratwegereza kurushaho!”, ihamagarira abakunzi ba muzika kuzitabira iki gitaramo bakishimira imyaka 60 imaze itanga serivisi.

Tom Close, amazina ye nyakuri akaba ari Thomas Muyombo, yamenyekanye cyane mu mpera z’imyaka ya 2000 binyuze mu ndirimbo z’urukundo n’uburyo bwe bwihariye bwo kuririmba injyana ya R&B.

Yarushijeho kumenyekana mu 2011 ubwo yabaga umuhanzi wa mbere wegukanye irushanwa rya Primus Guma Guma Super Star.

Mu myaka yakurikiyeho, yakomeje kuba umwe mu bahanzi bazwi mu ruganda rwa muzika nyarwanda, binyuze mu ndirimbo ze zakunzwe n’abantu bo mu byiciro bitandukanye by’imyaka.

Kuba yongewe kuri uru rutonde byiyongera ku mubare w’abahanzi bamaze kwemezwa muri iki gitaramo, bafite uruhare mu iterambere rya muzika nyarwanda yo muri iki gihe.

Bruce Melodie ni umwe mu bahanzi ba mbere batangajwe ko bazitabira ibi birori. Azataramira abakunzi be mu ndirimbo ze zitandukanye no mu buryo bwe buzwiho guhuza imbaga y’abafana.

Uyu muhanzi ni umwe mu bamaze kwigarurira imitima y’abakunzi ba muzika nyarwanda, haba mu gihugu no hanze yacyo, binyuze mu ndirimbo ze no gukorana n’abandi bahanzi.

Butera Knowless na we azataramira abazitabira iki gitaramo. Azwiho kugira uruhare mu iterambere ry’injyana ya Pop na R&B mu Rwanda, ndetse mu 2015 aba umugore wa mbere wegukanye irushanwa rya Primus Guma Guma Super Star.

Kuba azahurira kuri stage na Tom Close na Bruce Melodie bizahuza abahanzi bamaze igihe mu muziki nyarwanda, buri wese akaba yaragize uruhare mu bihe bitandukanye by’iterambere ry’uruganda rw’imyidagaduro.

Mu njyana ya Hip Hop, hazaba harimo Riderman na Tuff Gang.

Riderman amaze imyaka myinshi ari umwe mu bahanzi bakomeye mu njyana ya Rap mu Rwanda, mu gihe Tuff Gang na yo yabaye imwe mu matsinda yagize uruhare mu gukundisha urubyiruko iyi njyana.

Aba bahanzi bazaha abakunzi ba muzika amahirwe yo kongera kwishimira indirimbo zagize uruhare mu gukundisha urubyiruko nyarwanda Hip Hop.

Itsinda rya Active na ryo ryamaze kwemezwa muri iki gitaramo. Rizwi cyane mu ndirimbo zakunzwe no mu mbyino zaryo, cyane cyane mu myaka ya 2010, rikaba riri mu mazina azwi n’abakunzi benshi ba muzika nyarwanda.

Guhuza aba bahanzi bizatuma iki gitaramo kirangwa n’injyana zitandukanye zirimo R&B, Pop, Hip Hop n’iz’imbyino, binyuze mu bahanzi bagize uruhare mu iterambere ry’imyidagaduro mu Rwanda mu myaka isaga 20 ishize.

Banki ya Kigali yashinzwe mu 1966, ikaba iri kwizihiza imyaka 60 imaze ikorera mu Rwanda binyuze mu bikorwa bitandukanye birimo imyidagaduro, siporo n’ibikorwa bigamije guteza imbere imibereho y’abaturage.

Mu bindi bikorwa byabanje, iyi banki yateguye ibirori mu Karere ka Rubavu byahuriranye n’ibikorwa bya siporo y’umupira w’amaguru n’ibitaramo by’abahanzi barimo Riderman, Juno Kizigenza na Kitoko Bibarwa.

Igitaramo cya BK Arena kizaba ari kimwe mu bikorwa bikomeye bizizihiza iyi sabukuru, aho abahanzi bo mu bihe bitandukanye bazahurira ku rubyiniro rumwe.

Banki ya Kigali yatangaje ko mu gihe imyiteguro ikomeje, hashobora kuzatangazwa abandi bahanzi bazitabira iki gitaramo.

RADIOTV10

Sangira: Facebook Twitter WhatsApp

Leave a Reply

Your email address will not be published. Required fields are marked *

three × three =