Perezida wa Uganda, Yoweri Kaguta Museveni, yakoze impinduka mu buyobozi bw’Abanyamabanga Bahoraho muri Minisiteri, inzego za Leta n’ibigo bya Leta, asezerera 11 muri bo, ashyiraho abandi bashya 13.
Izi mpinduka zatangajwe kuri uyu wa Mbere, tariki 09 Ugushyingo 2026, zirimo gushyiraho abayobozi bashya, kugumisha bamwe mu myanya bari basanzweho, kwimura abandi mu nshingano nshya no gusezerera abageze mu zabukuru.
Itangazo rya Guverinoma ya Uganda rivuga ko Perezida Museveni yagumishije Abanyamabanga Bahoraho 16 mu myanya bari basanzweho, ashyiraho 13 bashya, mu gihe abandi 11 basezerewe mu mirimo ya Leta.
Museveni yakoze izi mpinduka akurikije ububasha ahabwa n’Itegeko Nshinga rya Uganda ryo mu 1995, by’umwihariko mu ngingo za 99, iya 172 n’iya 17.
Mu basezerewe harimo Adolf Mwesige wari Umunyamabanga Mukuru w’Inteko Ishinga Amategeko; Maj. Gen. David Kasura Kyomukama wakoraga muri Minisiteri y’Ubuhinzi, Ubworozi n’Uburobyi; Dr. Rose Nassali Lukwago na Rose Kafeero bakoraga mu Rwego rw’Ubugenzuzi bwa Leta; ndetse na Alex Okello wakoraga mu Rwego rushinzwe Imyitwarire myiza n’Ubunyangamugayo.
Abandi basezerewe ni Dorcus Okalany wo muri Minisiteri y’Ubutaka, Imiturire n’Imijyi; Bageya Waiswa wo muri Minisiteri y’Ibikorwa Remezo n’Ubwikorezi; Edith Mwanje wo mu Muryango wa Afurika y’Iburasirazuba; Alfred Okidi wo muri Minisiteri y’Amazi n’Ibidukikije; Dr. John Geoffrey Mutabazi wo muri Komisiyo ishinzwe Abakozi ba Leta na Pius Bigirimana wari Umunyamabanga w’Urwego rw’Ubucamanza.
Impinduka zikurikiye amasezerano yarangiye
Izi mpinduka zije nyuma yuko mu kwezi gushize, Umuyobozi wungirije ushinzwe abakozi ba Leta, Jane Mwesiga Kyarisiima, atangaje ko amasezerano y’akazi ya bamwe mu Banyamabanga Bahoraho yari yarangiye ku wa 28 Nyakanga 2026.
Yasobanuye ko gutinda gushyiraho Komisiyo ishinzwe Abakozi ba Leta byatumye isuzuma ry’imikorere y’abo bayobozi ritinda.
Yagize ati “Ntabwo twari dufite Komisiyo ishinzwe Abakozi ba Leta. Amasezerano yabo yari yarangiye ku wa 28 Nyakanga 2026, ariko Perezida aherutse gushyiraho Komisiyo, tuyihugura mu cyumweru gishize. Ubu yatangiye imirimo kandi izashobora gusuzuma imikorere y’abari bafite amasezerano yarangiye, hanyuma igatanga ibyifuzo kuri Perezida ku bijyanye no kongera kubashyiraho.”
Icyo gihe Kyarisiima yavuze ko mu gihe hagitegerejwe iryo suzuma, Abanyamabanga Bahoraho bari barangije amasezerano batakomezaga imirimo, ahubwo bari bategereje kuganira na Komisiyo ishinzwe Abakozi ba Leta.
Yongeyeho ko ibyo bitateje icyuho mu mikorere ya Guverinoma, kuko iyo Umunyamabanga Uhoraho avuye ku nshingano, asigira umusimbura w’agateganyo inshingano zo gukomeza kuyobora urwego.
Muri Uganda, Abanyamabanga Bahoraho bahabwa amasezerano y’imyaka itatu ishobora kongerwa, agacungwa na Minisiteri ishinzwe Abakozi ba Leta.
Mu kwezi gushize, Museveni yari yashyizeho abagize Komisiyo nshya ishinzwe Abakozi ba Leta icyenda, barahiriye inshingano ku wa 16 Ukwakira 2026. Iyo Komisiyo iyobowe na Vincent Seruma, yungirijwe na Jen Sanji.
RADIOTV10