Ikigo cy’lgihugu Gitsura Ubuziranenge (RSB) cyavanyeho ibyemezo byatangiweho Ikirango cy’Ubuziranenge (S-Mark) ku binyobwa by’inganda 47 zirimo izikora ibinyobwa bisemubuye ziherutse gufungwa no gusabwa guhita zikura ku isoko ibinyobwa byazo.
Iki cyemezo cyatangajwe na RSB hashingiwe ku Itegeko No 50/2013 ryo kuwa 28/06/2013 rishyiraho iki Kigo kandi rikagena inshingano, imiterere n’imikorere byacyo, by’umwihariko ingingo ya 4 (7) ku itangwa ry’ibirango by’ubuziranenge no gukurikirana ikoreshwa ryabyo.
Iki kigo kivuga kandi ko kwambura biriya byemezo izi nganda byakozwe “Mu rwego rwo kurengera ubuzima n’umutekano by’abaturage, RSB iramenyesha abakora ibinyobwa, ababigeza ku isoko, abacuruza ndetse n’abaturage muri rusange.”
Ku bw’iyo mpamvu, RSB ivuga ko “ivanyeho ibyemezo byatangiweho Ikirango cy’Ubuziranenge (S-
Mark) ku binyobwa by’inganda” zagaragajwe ku mugereka w’iri tangazo.
RSB kandi yahagaritse ikoreshwa ry’lkirango cy’Ubuziranenge ku binyobwa by’izo nganda, inategeka ko “abakora ibyo binyobwa guhita basaba ababikwirakwiza kubigarura mu bubiko bw’uruganda kandi bigakurwa ku isoko hakurikijwe amabwiriza yo kuwa 02 no kuwa 03 Kanama 2026 yatanzwe na Rwanda FDA.
Iki Kigo kivuga ko kutubahiriza ibikubiye muri iri tangazo bizatuma hafatwa izindi ngamba ziteganywa n’amategeko n’amabwiriza abigenga.
RADIOTV10