Minisitiri w’Ububanyi n’Amahanga n’Ubutwererane, Amb. Olivier Nduhungirehe ari i Seoul muri Korea y’Epfo, aho yitabiriye Inama y’ubufatanye bw’iki Gihugu n’Umugabane wa Afurika, igamije gushakira hamwe ingamba zo guhangana n’impinduka zugarije Isi.
Nk’uko byatangajwe na Minisiteri y’Ububanyi n’Amahanga n’Ubutwererane y’u Rwanda, “Minisitiri Olivier Nduhungire ari i Seoul muri Korea y’Epfo, mu nama ya 2026 y’Abaminisitiri b’Ububanyi n’Amahanga ba Korea na Afuruka.”
Iyi nama ifite insanganyamatsiko igira iti “Korea-Africa Partnership for Joint Response Amid Global Transformation.” Mu Kinyarwanda bishatse kuvuga “ubufatanye bwa Korea na Afurika mu gushakira hamwe ingamba ku mpinduka zugarije Isi.”
Iyi nama ibaye ku nshuro yayo ya mbere, irahuza abahagarariye Ibihugu 50 byo ku Mugabane wa Afurika, igamije kongerera imbaraga imikoranire y’Ibihugu mu gushakira hamwe uko bikwiye kwitwara mu mpinduka zikomeje kugaragara ku Isi, by’umwihariko ibijyanye mu bijyanye n’ubucuruzi, ndetse n’urujya n’uruza rw’ibicuruzwa, kimwe n’ibibazo bigenda bibikoma mu nkokora bishingiye kuri Politiki yo guhangana kw’Ibihugu bikize.
Biteganyijwe ko iyi nama yitabirwa n’amatsinda aturutse mu Bihugu 50 muri 54 byo ku Mugabane wa Afurika, ndetse n’Imiryango ine yo ku rwego rwa Afurika, nk’Umuryango wa Afurika Yunze Ubumwe, ndetse na Banki Nyafurika itsura Amajyambere.
Nk’uko byatangajwe n’Ibiro by’Umukuru w’Igihugu muri Korea y’Epfo, biteganyijwe ko kuri uyu wa Kabiri Perezida Lee Jae Myung azahura n’amatsinda arenga 20 yo ku rwego rw’Abaminisitiri aturutse mu Bihugu binyuranye byo muri Afurika, bakagirana ibiganiro bigamije guteza imbere imikoranire ya Korea y’Epfo n’Umugabane wa Afurika.
Afungura ku mugaragaro iyi nama, Minisitiri w’Ububanyi n’Amahanga wa Korea y’Epfo, Cho Hyun yagaragaje uruhare rukomeye Afurika ifite mu gushaka ingamba zo guhangana n’imihindagurikire ya politiki yateye ibibazo mu bucuruzi bw’Isi, n’uruhererekane rw’ibicuruzwa.
Cho yavuze Isi yugarijwe n’izamuka ry’urusobe rw’ibibazo birimo ibijyanye n’ingendo z’ibicuruzwa, ndetse n’ikibazo gikomeje kwiyongera cy’ibijyanye n’ingufu n’icyo kwihaza mu biribwa.
Yagize ati “Bitewe n’ikibazo cy’umutekano mucye mu Burasirazuba bwo Hagati ndetse n’ibibazo biri mu muhora wa Hormuz, uruhare rukenewe rwa Afurika mu bijyanye n’ubukungu, rukomeje kugaragara.”
Yavuze ko muri iki gihe ari bwo byagaragaye ko hakenewe imikoranire hagati ya Korea y’Epfo n’Umugabane wa Afurika, kurusha ibindi bihe byabayeho.
RADIOTV10
