Sosiyete y’itumanaho MTN Rwanda na Viamo batangije uburyo bwise Miss Baza, bukoresha ubwenge buhangano (AI), bufasha abaturage kubaza ibibazo no kubona ibisubizo ku ngingo zirimo uburezi, ubuzima, ubuhinzi, imicungire y’amafaranga n’ibindi byo mu buzima bwa buri munsi, ndetse no kumva ibiganiro birimo ibya RADIOTV10, badakeneye interineti cyangwa telefoni zigezweho.
Iyi serivisi yatangijwe ku mugaragaro ku wa 29 Ukwakira 2026. Abayikoresha bashobora kubaza ibibazo mu ijwi, bagahabwa ibisubizo mu Kinyarwanda, Icyongereza, Igifaransa n’Igiswahili. Sosiyete nyarwanda y’ikoranabuhanga, Pindo, na yo yagize uruhare mu kuyiteza imbere.
Mu bitabiriye umuhango wo kuyitangiza harimo Minisitiri w’Ikoranabuhanga no Guhanga Udushya, Paula Ingabire, Umuyobozi Mukuru wa MTN Rwanda, Monzer Ali, Umuyobozi Mukuru wa Eden Care Rwanda, Kevin Rudahinduka, na Céline Duros, ushinzwe ubufatanye bwa Viamo muri Afurika y’Iburasirazuba n’iy’Amajyepfo ndetse no muri Aziya.
Korohereza Abanyarwanda kubona amakuru hifashishijwe ikoranabuhanga
Abanyarwanda babiri kuri batatu ntibagira telefoni zigezweho, nk’uko bigaragazwa n’imibare ku buryo abaturage bagera kuri serivisi z’ikoranabuhanga. Ibi bituma bamwe bagorwa no kubona amakuru, ibikoresho bibafasha mu myigire n’andi mahirwe aboneka kuri interineti.
Miss Baza igamije kugabanya izo mbogamizi, ifasha abaturage kubona amakuru n’ubumenyi ku bijyanye n’uburezi, ubuvuzi, ubuhinzi, imicungire y’amafaranga n’ubumenyi bubafasha mu buzima bwa buri munsi.
Izafasha by’umwihariko abatuye mu byaro n’abandi bafite ubushobozi buke bwo gukoresha interineti, kuko bashobora kubaza ibibazo no kubona ibisubizo bakoresheje telefoni basanzwe bafite.
MTN Rwanda yatangaje ko Miss Baza imaze kugera ku bantu barenga ibihumbi 500, mu gihe serivisi isanzwe itanga amakuru binyuze kuri telefoni ikoreshwa n’abantu bagera kuri miliyoni ebyiri buri kwezi.
Uko Miss Baza na RADIOTV10 Corner zikoreshwa
Abakiliya ba MTN bashobora gukoresha Miss Baza bahamagara kuri 845, bagahitamo uburyo bwo kuganira na AI, maze bakabaza ibibazo byabo.
Buri mukiliya ahabwa iminota 30 y’ubuntu buri kwezi. Iyo iyo minota irangiye, yishyura amafaranga 45 Frw ku munota.
Kuri uwo murongo wa 845 hanaboneka Radio10 Corner, aho abayikoresha bahitamo umubare 3 kugira ngo bumve amakuru, ibiganiro bya siporo, imyidagaduro, ubuzima bwo mu mutwe, amasomo y’ubumenyi bufasha mu buzima bwa buri munsi n’ibindi biganiro byigisha, badakoresheje interineti.
Mu gihe Miss Baza ituma umuntu abaza ibibazo akaganira na AI, Radio10 Corner yo itanga ibiganiro by’amajwi umuntu ashobora guhitamo bitewe n’ibyo yifuza kumva.
Abafatanyabikorwa basobanuye imikorere y’iri koranabuhanga
Rene Nzabakira, ushinzwe ibikoresho na serivisi z’ikoranabuhanga muri MTN Rwanda, yavuze ko Miss Baza yari imaze igihe igeragezwa mbere yo gutangizwa ku mugaragaro.
Yagize ati: “Mu ntangiriro yari mu igeragezwa, ariko uyu munsi twayitangije ku mugaragaro. Ubu tugiye kurushaho kuyinoza dushingiye ku bibazo abakiliya bakunze kubaza.”
Céline Duros yasobanuye ko Miss Baza yifashisha Gemini, ikoranabuhanga rituma abantu bashobora kubaza ibibazo no guhabwa ibisubizo nk’abari mu kiganiro gisanzwe.
Yagize ati: “Miss Baza ishingiye ku ikoranabuhanga rya Gemini. Ku bufatanye na MTN, turigeza ku bantu. Nubwo inyuma yaryo hari ikoranabuhanga rikomeye kandi rifite uburyo buhambaye rikora, ku muntu urikoresha biba ari ukuganira gusa.”
Umuyobozi Mukuru wa MTN Rwanda, Monzer Ali, yavuze ko iyi serivisi iri mu bikorwa bigamije gushyigikira gahunda y’u Rwanda yo kubyaza umusaruro ubwenge buhangano.
Ati: “U Rwanda rwatangiye kwitegura kubyaza umusaruro amahirwe azanwa na AI, natwe twifuza kugira uruhare muri urwo rugendo.”
Ali yavuze ko iyi serivisi izakomeza kunozwa kugira ngo hakosorwe amakosa ashobora kugaragara, kandi irusheho guhaza ibyifuzo by’abayikoresha.
Guverinoma yasabye ko AI ikoreshwa mu gukemura ibibazo by’abaturage
Minisitiri w’Ikoranabuhanga no Guhanga Udushya, Paula Ingabire, yavuze ko imishinga ikoresha AI ikwiye gushyira imbere gukemura ibibazo bifatika abaturage bahura na byo, aho kwibanda gusa ku gukoresha ikoranabuhanga rigezweho.
Yagize ati: “Ni ikibazo cya nde turi gukemura? Ni ikihe kibazo turi gukemura? Kandi ni ubuhe buryo bwiza bwo kugikemura? Ntekereza ko nitubasha gusubiza ibi bibazo bitatu, AI izagira akamaro gafatika ku baturage bacu.”
Ingabire yashimangiye ko amakuru atangwa na Miss Baza agomba kuba yizewe kandi agahora avugururwa, ko igiciro cyayo kigomba kuba cyoroheye abayikoresha ndetse n’amakuru yabo bwite akarindwa.
Yasabye MTN n’abafatanyabikorwa bayo kugaragaza, mu minsi 100 ya mbere ikurikira itangizwa ry’iyi serivisi, uko ishobora gufasha gukemura kimwe mu bibazo abaturage bakunze guhura na byo.
Yavuze ko umusaruro wa Miss Baza udakwiye gupimirwa gusa ku mubare w’abayihamagara, ahubwo hakarebwa niba ibisubizo bahabwa bibafasha gufata ibyemezo biboneye, kudatakaza igihe no kugabanya ingendo zitari ngombwa.
Kwagura ubufatanye na serivisi zizongerwaho
Biteganyijwe ko Miss Baza izakomeza kwagurwa binyuze mu bufatanye n’inzego za Leta, ibigo by’ubucuruzi n’indi miryango, kugira ngo abaturage barusheho kubona amakuru bakeneye.
Eden Care iri mu bafatanyabikorwa ba mbere, ikaba ifasha mu gutanga amakuru ajyanye na serivisi z’ubwishingizi bw’ubuzima.
Hari kandi gahunda yo guhuza Miss Baza na MTN Mobile Money, ku buryo abayikoresha bazashobora kwishyura serivisi zirimo amazi, amashanyarazi, parikingi n’imisoro bakoresheje amabwiriza batanga mu ijwi.
Minisitiri Ingabire yanasabye ko Miss Baza yahuzwa na Mbaza, urubuga rwa Leta rwifashishwa mu gutanga amakuru no gukurikirana ibibazo by’abaturage mu nzego z’ibanze, kugira ngo abaturage bajye bahabwa amakuru ahuje kandi yizewe.
MTN n’abafatanyabikorwa bayo batangaje ko bazakomeza kunoza ibisubizo bitangwa na Miss Baza no kongera ubushobozi bwayo uko abayikoresha bagenda biyongera.
Elie GATETE
RADIOTV10