Nigeria: Hemejwe urupfu rw’Umugaba w’Ingabo Gen.Taoreed Lagbaja hatangazwa n’icyamuhitanye

Perezida wa Nigeria, Bola Tinubu yatangaje ko Umugaba Mukuru w’Ingabo z’iki Gihugu, General Taoreed Lagbaja, yitabye Imana ku myaka 56 y’amavuko.

General Taoreed yapfuye ku mugoroba wo ku wa Kabiri i Lagos, nyuma y’igihe arwaye, gusa ntihatangajwe amakuru arambuye ku ndwara yamuhitanye.

Mu itangazo ryatanzwe na Bayo Onanuga, Umuvugizi wa Perezida, arinyujije ku rubuga nkoranyambaga rwa X, rivuga ko Perezida Tinubu yihanganishije byimazeyo umuryango wa General Lagbaja.

Itangazo rigira riti “Perezida Tinubu yifuriza Lt General Lagbaja kuruhuka mu mahoro, kandi ashimira uruhare rwe rukomeye yagize mu kubaka Igihugu.”

Iri tangazo rivuga ko urupfu rwe ari igihombo gikomeye ku Ngabo za Nigeria, yagizemo uruhare rukomeye mu bikorwa byinshi byo kurinda umutekano w’imbere mu Gihugu.

Tariki 19 Kamena 2023, ni bwo Perezida Tinubu yazamuye mu ntera Lt General Lagbaja amugira Umugaba Mukuru w’Ingabo z’Igihugu cya Nigeria.

Shemsa UWIMANA
RADIOTV10