Ikipe ya RRA mu bagore ndetse na Police VC mu bagabo ni zo zegukanye ibikombe mu irushanwa “Climate Action Volleyball Tournament”ryateguwe mu rwego rwo kwizihiza icyumweru cyahariwe kubungabunga ibidukikije, mu mikino ya nyuma yakiniwe ku Gisagara kuri uyu wa gatandatu taliki ya 30 Gicurasi
Mu mukino wa nyuma w’abagore, RRA WVC yatsinze Police VC amaseti 3-2 mu mukino wari ukomeye kandi urimo guhangana gukomeye hagati y’impande zombi.
RRA WVC 3-2 Police WVC
(26-24, 25-22, 15-25, 23-25, 15-11)
Iki ni igikombe cya mbere RRA yegukanye muri uyu mwaka nyuma yo gusoza inshuro nyinshi iri ku mwanya wa kane mu marushanwa atandukanye.
Mu bagabo, Police VC yegukanye igikombe nyuma yo kuva inyuma ikishyura REG VC amaseti abiri yari yabanje kuyitsinda, iyitsinda ku iseti ya 5.
Police VC 3-2 REG VC
(19-25, 18-25, 25-23, 25-22, 15-11)
Amakipe yatwaye ibikombe ariyo Police VC mu bagabo na RRA mu bagore yahawe igihembo cya miliyoni 4 Frw buri imwe, mu gihe ayabaye aya kabiri ariyo REG VC mu bagabo na Police WVC mu bagore yahawe miliyoni 3 Frw buri imwe .
Yaba ikipe yabaye iya mbere n’iyabaye iya kabiri, zahembwe amafaranga menshi kurusha ayatanzwe muri shampiyona , dore ko iyayegukanye yahembwe miliyoni ebyiri.
Aya makipe yombi agiye guhita atangira imyiteguro y’irushanwa ryo kwibuka Jenoside yakorewe Abatutsi mu 1994, rizwi nka GMT.
Climate Action Volleyball Tournament ni irushanwa ryateguwe ku bufatanye bw’Ikigo cy’Igihugu Gishinzwe Kurengera Ibidukikije (REMA) n’Ishyirahamwe ry’Umukino wa Volleyball mu Rwanda (FRVB), hagamijwe kwifashisha siporo mu gukangurira Abanyarwanda ibikorwa byo kurengera no kubungabunga ibidukikije.
Ephrem KAYIRANGA
RADIOTV10
