Imvura nyinshi yaguye muri Somalia yatumye bimwe mu bikorwa bihagarara amashuri, kubera imyuzure yangije ibyumba by’amashuri, ku buryo abanyeshyri barenga ibihumbi 37 babaye bahagaritse amasomo.
Ibi byatangajwe n’inzego zishinzwe uburezi muri Somalia nyuma y’uko imyuzure ikomeye yibasiye bimwe mu bice by’iki Gihugu, ikangiza ibikorwa bitandukanye birimo amashuri yarengewe.
Ababyeyi benshi muri iki Gihugu batangaje ko bahangayikishijwe no kuba uyu mwuzure wagira ingaruka ku myigire y’abana babo biteguraga ibizamini bya Leta mu munsi iri imbere.
Icyakora inzego z’ubuyobozi muri Somalia zatangaje ko ziri gukora ibishoboka byose kugira ngo iyi myuzure idahungabanya imyigire y’abanyeshuri bitegura gukora ibizamini bya Leta.
Ibiza nk’ibi si ubwa mbere bibaye muri Somalia kuko n’umwaka ushize byabaye ndetse bwo bigira ingaruka nini ku myigire y’abanyeshuri, kuko byatumye ingengabihe y’ibizamini bya Leta, ihinduka.
Shemsa UWIMANA
RADIOTV10
