Guverinoma y’u Rwanda n’iya Israel, ziyemeje gushimangira ubufatanye n’umubano usanzwe hagati y’Ibihugu byombi, zinasinya amasezerano y’imikoranire mu by’uburezi.
Ni bimwe mu byaranze uruzinduko Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe ari kugirira muri Israel.
Kuri uyu wa Mbere tariki 06 Nyakanga 2026, Minisitiri Nduhungirehe yakirwe na mugenzi we, Minisitiri w’Ububanyi n’Amahanga wa Israel, Gideon Sa’ar.
Nk’uko byatangajwe na Minisiteri y’Ububanyi n’Amahanga n’Ubutwerane mu Rwanda, “Minisitiri Olivier Nduhungirehe yagiranye ibiganiro byiza na na nyakubahwa Gideon Sa’ar, Minisitiri w’Ububanyi n’Amahanga wa Iirael, byibanze ku gushimangira ubufatanye hagati y’Ibihugu byombi no kungurana ibitekerezo ku bibazo by’akarere n’iby’isi.”
Iyi Minisiteri kandi yatangaje ko aba bakuriye Dipolomasi y’u Rwanda na Israel banashyize umukono ku masezerano y’imikoranire arimo ayo mu rwego rw’uburezi, ndetse n’ajyanye n’iterambere.
Kuri uyu wa Mbere kandi, Minisitiri Olivier Nduhungirehe yanasuye ibindi bikorwa birimo Ikigo cya Yad Vashem, gishinzwe ubushakashatsi, kubika amateka ya Jenoside y’Abayahudi no kuyigisha.
Minisitiri Nduhungirehe kandi “yashyize indabo zo kwibuka abazize Jenoside yakorewe Abayahudi ndetse anagirana ibiganiro byiza na Chairman Danny Dayan [Umuyobozi wa Yad Vashem].”
Minisiteri y’Ububanyi n’Amahanga n’Ubutwererane, ivuga ko “Bashingiye ku ruzinduko aherutse (Danny Dayan) gukorera i Kigali muri Kwibuka 32, bongeye kwemeza ko biyemeje kongera ubufatanye mu Kwibuka, kwigisha, ubushakashatsi no gukumira Jenoside.”
Minisitiri Nduhungirehe kandi, ari kumwe na mugenzi we wa Israel, Gideon Sa’ar banifatanyije n’Umuryango mugari w’Abanyarwanda baba muri Israel abagize itsinda ry’abadipolomate, n’inshuti z’u Rwanda mu kwizihiza isabukuru y’imyaka 32 u Rwanda rumaze rwibohoye
Ni ibirori byaranzwe n’ibikorwa binyuranye birimo kwibukiranya no kugaragaza urugendo rutangaje rw’u Rwanda rwo kwiyubaka no kwigira ndetse n’intambwe ishimishije rukomeje gutera mu mikoranire n’ubufatanye hagati y’iki Gihugu na Israel.
RADIOTV10
