Umuririmbyi Liam Payne wahoze mu itsinda rya muzika rya One Direction, yitabye Imana ahanutse ku nyubako ya etaje ya Hoteli yo muri Argentina yari acumbitsemo.
Uyu muririmbyi w’Umwongereza Liam Payne, yitabye Imana ku myaka 31 kuri uyu wa Gatatu tariki 16 Ukwakira, ubwo yari muri hoteli iherereye muri Buenos Aires muri Argentina.
Itangazo ryashyizwe hanze na Polisi yo muri Buenos Aires, rivuga ko nyakwigendera yapfuye yikubise hasi aturutse ku igorofa ya gatatu muri Hoteli ya Casa Sur Hotel, akaba “yazize ibikomere bikomeye” nk’uko byanemejwe n’abaganga bakoze isuzuma ku rupfu rwe.
Umuyobozi ushinzwe itumanaho muri Minisiteri y’Umutekano muri Buenos Aires, Pablo Policicchio, yabwiye Ibiro Ntaramakuru Associated Press ko Payne “yasimbutse avuye ku rubaraza rw’icyumva cye” ndetse Polisi ikihutira kuhagera nyuma yo gutabazwa, saa kumi n’imwe z’umugoroba zo muri aka gace.
Yavuze ko ibi byabaye nyuma yuko hari utabaje avuga ko “hari umuntu ufite umujinya ushobora kuba yanyoye ibiyobyabwenge n’ibisindisha.”
Umuyobozi w’iyi Hoteli yumvise kandi ijwi ry’uwahamagaye ku murongo wa telefone ya Hoteli, avuga ko hari “umuntu ucumbitse muri iyi hoteli warenzwe n’ibiyobyabwenge n’inzoga, uri kumerangura ibintu mu cyumba, rero mwohereze umuntu.”
Nyakwigendera Liam Payne, ni umwe mu bari bagize itsinda ‘One Direction’ ryamamaye ku Isi, kuva muri za 2010, kugeza muri 2015 ubwo abari barigize batangiraga kuririmba ku giti cyabo.
RADIOTV10
