Umuhanzikazi w’icyamamare ukomoka muri Nigeria, Tiwa Savage, yongewe mu bagomba gususurutsa abazitabira ibirori byo kwimika Umwami w’u Bwongereza, Charles III, abari na we muhanzi w’Umunyafurika wa mbere ururimbye muri ibi birori.
Ibi birori biba bitegerejwe n’Isi yose, bizaba kuri uyu wa Gatandatu tariki 06 Gicurasi 2023 i Westmister Abbey, i London mu Bwongereza.
Nk’uko ikinyamakuru Afrikanews.com dukesha iyi nkuru cyabyanditse n’ibindi binyamakuru bitandukanye, Tiwa Savage yiyongereye mu byamamare byinshi byatumiwe muri uyu muhango nka Steve Winwood, DJ PeteTong, Paloma Taith, Lang Langa, Lucy na Olly Murs bazataramira abashyitsi mu gitaramo cyo kwimika Umwami ndetse na Big Launch iteganyijwe ku Cyumweru tariki 07 Gicurasi 2023 ari nawo munsi nyirizina Tiwa Savage azaririmbaho.
Mu itangazo ryasohowe n’abateguye ibi biriro, bavuze ko Tiwa Savage yatoranyijwe nk’umwe mu bahanzi bacye bo muri Afurika bazitabira iyimikwa ry’umwami, kuko afite ubuhanga bwihariye.
Itangazo riragira riti “Twishimiye kumenyesha ko Tiwa Savage azaririmbira mu gitaramo cyo kwimika Umwami hamwe n’abandi bahanzi bo ku rwego rw’isi. Tiwa Savage ni umuhanzi udasanzwe ufite ijwi ryihariye muri Afurika no mu Burengerazuba.”
Esther Fifi UWIZERA
RADIOTV10
