Tim Kennedy, wahoze mu mutwe w’ingabo zidasanzwe za Leta Zunze Ubumwe za Amerika ndetse akaba yaramenyekanye mu marushanwa y’imikino njyarugamba ikomatanyije (MMA), byamenyekanye ko yarasiwe muri Repubulika Iharanira Demokarasi ya Congo mu kwezi gushize.
Kennedy w’imyaka 47 bivugwa ko yarasiwe mu gico cyagabwe n’abantu bitwaje intwaro ku wa 17 Nzeri 2026. Icyo gitero cyahitanye Justin Conaglen, na we wahoze mu mutwe w’ingabo zidasanzwe za New Zealand, mu gihe undi mugabo bari kumwe yakomeretse.
Kennedy yamenyekanye mu gisirikare cya Amerika, aho yakoraga mu mutwe uzwi nka Green Berets, mbere yo kwinjira mu marushanwa ya UFC, ahuriramo abakinnyi b’imikino njyarugamba itandukanye.
Robert Young Pelton, umunyamakuru uzwiho gukurikirana amakuru ajyanye n’intambara, yabwiye ikinyamakuru New Zealand Herald ko Kennedy na bagenzi be babiri bari muri RDC mu kazi ko kurinda ibirombe bicukurwamo amabuye y’agaciro.
Bivugwa ko akazi bakoraga kari gashingiye ku masezerano Leta ya RDC yagiranye na Erik Prince, Umunyamerika wahoze ari umucanshuro, ajyanye no kugenzura ibikorwa by’ubucukuzi bw’amabuye y’agaciro mu bice bitandukanye by’icyo gihugu.
Ku wa 8 Ukwakira 2026, Brent Tucker, na we wahoze mu mutwe w’ingabo zidasanzwe za Amerika uzwi nka Delta Force, yemeje aya makuru mu kiganiro cye cyitwa Tier 1 Live.
Mu gusobanura uko byagenze, Tucker yavuze ko Kennedy yarashwe amasasu agera kuri ane, mu gihe Conaglen na we yari kumwe na bo yapfuye. Yongeyeho ko umuntu wa gatatu bari kumwe na we yarashwe inshuro nyinshi.
Yagize ati: “Navuga ko Tim Kennedy, ntekereza ko yarashwe inshuro enye, yari kumwe n’umusirikare wihariye ukomoka muri New Zealand. Yarapfuye, ntakiriho. Uwa gatatu yarashwe inshuro nyinshi. Bari batatu, babiri barakomereka bikomeye, kandi ikibabaje ni uko umwe yapfiriye muri Congo.”
Tucker yagarutse kandi ku mbogamizi abacanshuro bahura na zo iyo baguye mu kaga bari mu bikorwa byabo. Yasobanuye ko iyo umuntu akorera ku masezerano yigenga aho kuba mu butumwa bwa gisirikare bwemewe na Leta ya Amerika, ataba afite uburenganzira bumwe n’ubw’abasirikare boherejwe n’icyo gihugu.
Yagize ati: “Iyo ukora nk’umucanshuro, nta bushobozi bw’igisirikare cya Amerika uba ufite. Iyo ibintu bihindutse bibi, hari umuntu uba witeze ko aza kugufasha, kandi akabikora vuba. Ariko nyuma yo kuraswa, ibyo ntibyabaye.”
Amakuru avuga ko Kennedy yamaze amasaha menshi ategereje ubufasha nyuma yo kuraswa. Amaze kububona, yaje koherezwa mu bitaro byo muri Amerika kugira ngo avurwe.
Tucker yavuze ko umuryango wa Kennedy utifuza kugira icyo utangaza kuri iki kibazo. Gusa, yavuze ko yahisemo kukivugaho kubera ko yari yaraganiriye n’abantu benshi yizeye ko bafite amakuru yizewe kuri icyo gitero.
Kugeza ubu, amakuru yatangajwe ku byabaye ashingiye ahanini ku buhamya bw’abantu bavuzwe muri iyi nkuru n’ibitangazamakuru byayanditse.
RADIOTV10