Ikipe y’Ingabo z’u Rwanda APR FC iri mu gikombe cya Mapinduzi Cup 2013 kiri kubera muri Zanzibar, yasezereye Young Africans yo muri Tanzania iyitsinze ibitego 3-1, ihita ibona itike ya 1/2.
Ni umukino wabaye kuri iki Cyumweru tariki Indwi Mutarama 2024, aho APR FC yawugezeho yarabanje kunganya na Simba na yo iri mu makipe akomeye mu karere.
Muri uyu mukino wabaye kuri iki Cyumweru, ikipe y’Ingabo z’u Rwanda, yabanjwe igitego cyatsinzwe ku munota wa 23’ na Jesus Moloko Ducapele wa Young Africans.
Ikipe ya APR ntiyacitse intege kuko yakomeje gushaka uburyo yakwishyura, ndetse biza kuyihira, mu minota y’inyongera y’igice cya mbere yishyura igitego cyatsinzwe na Sanda Soulei, amakipe yombi ajya kuruhuka anganya 1-1.
Igice cya kabiri cy’umukino kigitangira, APR yongeye kunyeganyeza incundura za Young, ku munota wa 48’ Victor Mbaoma atsinda igitego kuri penaliti.
Sharaf Eldin Shaiboub wa APR wagaragaje ubuhanga budasanzwe muri uyu mukino, yaje kubona igitego cy’agashinguracumu cya APR, ku munota wa 80’ atsindira iyi kipe y’Ingabo z’u Rwanda igitego cya gatatu.
APR yahise ikatisha itike ya 1/2 ikazahura na Mlandenge na yo yasezereye ikipe ya KVZ iyitsinze kuri penaliti 3-2 nyuma y’uko amakipe yombi yari yanganyije 0-0.
![](https://i0.wp.com/radiotv10.rw/wp-content/uploads/2024/01/GDQuSVJW4AABLwN.jpeg?resize=1310%2C953&ssl=1)
![](https://i0.wp.com/radiotv10.rw/wp-content/uploads/2024/01/GDQuT4aXQAA2gLu.jpeg?resize=1310%2C962&ssl=1)
![](https://i0.wp.com/radiotv10.rw/wp-content/uploads/2024/01/GDQuYRYXgAAcu66.jpeg?resize=1310%2C983&ssl=1)
![](https://i0.wp.com/radiotv10.rw/wp-content/uploads/2024/01/GDQuVm4WoAAyBNk.jpeg?resize=1310%2C953&ssl=1)
![](https://i0.wp.com/radiotv10.rw/wp-content/uploads/2024/01/GDQ_EKCW8AA68fM.jpeg?resize=2048%2C1557&ssl=1)
RADIOTV10