Imiryango 32 y’abo mu cyiciro cy’abo amateka agaragaza ko basigaye inyuma yo mu Kagari ka Mataba mu Murenge wa Nkungu mu Karere ka Rusizi, yabaga mu nzu zendaga kugwa, yahawe izigezweho yubakiwe.
Izi nzu zubatwe ku bufatanye bw’Urwego Rushinzwe Iterambere mu Rwanda (RDB), Ubuyobozi bw’Akarere ka Rusizi na Caritas ya Diyoseze Gatulika ya Cyangugu muri gahunda yo gusaranganya inyungu ziva mu bukerarugendo.
Aba baturage babaga mu nzu zashaje zendaga kugwa byatumaga bamwe bangiza ishyamba rya Cyamudongo ryagizwe agashami ka Pariki ya Nyungwe.
Icyiciro cya nyuma cy’izo nzu kigizwe n’izigera ku 10 abari basigaye bahanywe n’ibikoresho byo mu nzu birimo ibiryamirwa,ibyo mu gikoni ndeste n’ibiribwa.
Uwitwa Ngurinzira Jean Marie ufite ubumuga wabaga mu nzu y’ibiti itameze neza avuga ko yibazaga uburyo umuryango we uzatura mu nzu nziza bikamuyobera ubu akaba yishimiye ko yahawe inzu.
Ati “Mu buzima nari mbayemo sinari nteze kuzashobora kwiyubakira bitewe n’uko nagize impanuka igiti kikangwa ku mutwe bikantera ubumuga. Nshimishijwe no kuba mpawe inzu abana banjye batandatu bakazakurira ahantu heza.”
Mu gihe bamwe muri iyi miryango mbere bakoraga ibikorwa bitemewe byangizaga ishyamba rya Cyamudongo birimo nko kuritemamo ibiti, kuri ubu bavuga ko bamaze gusobanukirwa akamaro karyo ku buryo bavuga ko batazongera kuryangiza ahubwo ko bagiye kugira uruhare mu kurisigasira.
Nyirahavugimana Beatrice ati “Ndajya mbona umuntu wese winjiyemo yaba agiye kwahira cyangwa gutema igiti mpite mbibwira ubuyobozi kuko iyo ritaza kuba hano ntabwo tuba tubonye izi nzu.”
Umunyamabanga nshingwabikorwa w’umurenge wa Nkungu Habimana Emmanuel avuga ko mbere yo kubakirwa izi nzu aba baturage babaga mu z’ibiti zari zarashaje bigatuma hari abigabiza ishyamba rya Cyamudongo bashakamo ibiti byo kuzisana ariko aho batangiye kubakirwa iz’icyitegererezo ibyo bikorwa byo kwangiza bikaba byaragabanutse mu buryo bufatika.
Ati “Byaragabanutswe rwose. Kububakira byatanze umusaruro ku bijyanye no kubungabunga ishyamba. Mbere bajyagamo bagiye gutema ibiti byo kubakisha bashaka n’amababi yabyo yo gukinga ahabaga harahomotse. Ubu rero bari mu nzu nzima birumvikana ko ntawe uzongera kujya gushakayo ibiti byo kubakisha.”
Umuyobozi wa Cartas ya Diyoseze gatolika ya Cyangugu ucyuye igihe Padiri Irakoze Hyacinthe asaba abahawe inzu kuzifata neza bazigirira isuku kandi bakanazirikana kubungabunga ishyamba rya Cyamudongo bataryitiranya n’igihuru.
Ati “Izi nzu muzigirire isuku. Icyo nari nibagiwe kubabwira ni uko buri nzu ifite igikoni, ubwogero n’ubwiherero byiza. Mubifate neza hanyuma namwe mugire isuku. Dushe ntimuzazizirikemo ihene. mujye mukaraba muse neza. Mubungabunge iyi parike ya Cyamudongo ibegereye, iki ntago ari igihuru ni parike, ni ikigega cy’amafaranga mwirinde kuritwika no gutemamo ibiti.”
Umuyobozi ushinzwe guza parike abaturage na parike z’igihugu mu kigo cy’iterambere Mbabazi Marie Louise ushimira imikoranirire y’urwo rwego na Cartas mu gushyira mu bikorwa imishinga yo gusaranganya inyungu ziva mu bukerarugendo yijeje aba baturage ko nibahitamo inzira yo gufata neza Cyamudongo icyo bazasaba cyose kigendanye n’iterambere ry’imibereho yabo bazagihabwa.
Ati “Niba muhize umuhigo muti ntabwo parike izongera gutwikwa, nta muntu uzongera kujya gututiramo ibyatsi, namwe icyo musaba reta izakibaha. Bivuga ngo niba ari amavuriro adahari cyangwa amashuli nabyo bishyirwe ku murongo kugira ngo muzabibone.”
Inzu 10 z’icyiciro cya nyuma zahawe imiryango 10 zuzuye zitwaye agera kuri miriyoni 103Frw, mugihe zose hamwe uko ari 32 zifite agaciro gasaga miriyoni 280Frw naho ibikoresho bazihanywe birimo ibiryamirwa, ibyo mu gikoni ndeste n’ibiribwa byo bifite agaciro ka miriyoni 48 Frw.
Jean de Dieu NDAYISABA
RADIOTV10
