Hashyizwe hanze amafoto yafatiwe mu kirere agaragaza iyangirika rikomeye ry’uruganda rutunganya ibikomoka kuri Peteroli ruherereye mu mujyi wa Ras Tanura muri Arabia Saudite, rwarashweho n’indege zitagira abapilote za Iran.
Aya mafoto dukesha BBC, yafashwe nyuma yuko uru ruganda rurashweho ibisasu bya rutura na drones za Iran, yerekana urebeye mu kirere uburyo rwangiritse.
Aya mafoto yafashwe n’icyogajuru, yerekana ko uru ruganda rwafashwe n’inkongi idasanzwe, ahagaragaje ibyotsi byijimye bipfupfunukamo, muri uyu mujyi wa Ras Tanura mu burasirazuba bw’iki Gihugu cya Arabia Saudite.
Ubusanzwe uyu mujyi ni agace karimo inzira nyinshi zihuza ibigega by’ibikomoka kuri peteroli n’icyambu gihuza ubwato bwa rutura bune bubitwara.
Uru ruganda rwarashweho na Drones za Iran, ruri mu zikomeye muri Arabia Saudite, dore ko rufite ubushobozi gutunganya utugunguru ibihumbi 550 tw’ibikomoka kuri peteroli ku munsi.
Nyuma yuko intambara hagati ya Israel ifatanyije na US ndetse na Iran ikomeje kurasa ku Bihugu America ifitemo inyungu, ibiciro by’ikomoka kuri peteroli byahise bitumangira ku Isi.
Iri tumbagira ry’ibiciro by’ibikomoka kuri peteroli, uretse kuba rifitanye isano n’iraswa ry’inganda zibitunganya, n’amato abitwara mu njyanja, na yo ntiyorohewe, kuko na yo ari kuraswaho.
Ubusanzwe ibikomoka kuri peteroli bikoreshwa muri Afurika yo munsi y’Ubutayu bwa Sahara, 10% byabyo bituruka muri Arabia Saoudite, ahabarizwa ruriya ruganda rwarashweho rukangirika bikomeye.
RADIOTV10
