Col Michael Randrianirina uyoboye urwego rw’Igisirikare kiri ku butegetsi muri Madagascar, yirukanye Minisitiri w’Intebe, anasesa Guverinoma yose mu buryo butunguranye.
Iseswa rya Guverinoma y’Igihugu cya Madagascar kiyobowe n’Igisirikare cyahiritse ubutegetsi, ryatangajwe n’Umuvugizi wa Col Michael Randrianirina.
Itangazo ry’Umuvugizi we, rigira riti “Guverinoma yahagaritse imirimo yayo”, yongeraho ko Randrianirina azashyiraho Minisitiri w’Intebe mushya “hakurikijwe uko biteganywa n’Itegeko Nshinga.”
Nta mpamvu yatangajwe ku gusesa Guverinoma y’iki Gihugu cya Madagascar kiyobowe n’Igisirikare kuva mu kwezi k’Ukwakira 2026, ubwo cyahirikaga ubutegetsi.
Iki gisirikare cyahiritse ubutegetsi bwa Andry Rajoelina, nyuma yuko muri iki Gihugu hari hamaze igihe hari imyigaragambyo yari iyobowe n’urubyiruko.
Mu kwezi k’Ukwakira, nyuma yuko itsinda ry’abasirikare bari barimo na Col Michael Randrianirina bari biyunze ku rubyiruko rwari rumaze igihe mu myugaragambyo, ryaje gutangaza ko Rajoelina atakiri Perezida nyuma yuko yari yatowe muri 2023.
RADIOTV10
