Amakipe yabaye ane ya mbere nyuma y’imikino isanzwe ya shampiyona ya volleyball yatangiye guhangana mu mikino ya kimwe cya kabiri ya kamarampaka (play offs) yaba mu bagabo no mu bagore.
Imikino yakiniwe muri Petit Stade kuri uyu wa gatandatu taliki ya 14 Werurwe 2026, ahabanje iyo mu bagore ,itanabayemo ugutungurana nk’uko byagenze mu bagabo.
Muri 1/2 cya play offs ikipe yasoje imikino isanzwe ari iya mbere ihura n’iyabaye iya kane, mu gihe iyabaye iya kabiri ihura n’iyabaye iya gatatu.
Mu bagore APR WVC yabaye iya mbere yatsinze byoroshye amaseti atatu ku busa RRA WVC yabaye iya kane, ni nako byagenze kuri Police WVC yabaye iya kabiri yatsinze amaseti atatu ku busa Kepler WVC yabaye iya gatatu.
Mu bagabo niho habaye ugutungurana dore ko amakipe yabonye itike ya plyay offs ku munsi wa nyuma w’imikino isanzwe ya shampiyona , ariyo yatahukanye intsinzi kuri iyi mikino ya mbere ya kamarampaka.
Gisagara VC yabonye itike hasigaye iminsi (journèes) 2 ngo shampiyona isanzwe (regular season) irangire, yatunguwe na Police VC yayibonye ku munsi wa nyuma nabwo bigoranye , iyitsinda amaseti atatu kuri imwe.
Kepler VC nayo yasoje imikino isanzwe ya shampiyona ihagaze neza ku mwanya wa kabiri, yatsinzwe na REG VC amaseti atatu kuri abiri.
Aya makipe ari gukina atanguranwa kwitwara neza mu mikino itanu iba iteganyijwe kubahuza (best of five) ngo haboneke amakipe abiri agera ku mukino wa nyuma haba mu bagore no mu bagabo.
Imikino ya kabiri (game 2) ya kamarampaka iteganyijwe kuwa kabiri w’icyumweru gitaha taliki ya 17 Werurwe 2026 nayo ikazabera muri Petit Stade.
Ephrem KAYIRANGA
RADIOTV10
