Iran yatangaje ko yiteguye kugaba ibitero bikomeye ku bikorwaremezo by’amashanyarazi bya Israel, no ku bigo bitanga amashanyarazi ku birindiro bya America biri mu karere ka Gulf, mu gihe Perezida Donald Trump yashyira mu bikorwa umugambi aherutse gutangaza wo gusenya burundu ibikorwaremezo by’amashanyarazi bya Iran.
Ibi byatangajwe n’Ingabo z’Impinduramatwara za Iran (Islamic Revolutionary Guard Corps) mu itangazo zasohoye kuri uyu wa Mbere.
Iryo tangazo rigira riti: “Perezida wa Leta Zunze Ubumwe za Amerika yatangaje ibinyoma by’uko ingabo zacu (Revolutionary Guards) ziteganya gutera ibikorwaremezo bitunganya amazi no guteza ibibazo abaturage bo mu bihugu byo muri aka karere.”
Rikomeza rivuga riti: “Twamubwira ko twiyemeje gusubiza igitero icyo ari cyo cyose ku rugero rungana n’ingaruka kigira, mu rwego rwo gukumira ibindi… Nimutera amashanyarazi, natwe tuzatera amashanyarazi.”
Ku wa Gatandatu, tariki ya 21 Werurwe 2026, ni bwo Perezida Donald Trump yaburiye ko inganda z’amashanyarazi za Iran zizasenywa niba Tehran itemeye gufungura inzira ya Hormuz ku bwato bwose mu gihe cy’amasaha 48. Trump yashyizeho nyirantarengwa kugeza kuri uyu wa Mbere saa moya n’iminota 45 z’umugoroba ku isaha ya EDT (23:45 GMT).
Ibitero bya Israel na Amerika kuri Iran byatumye iyi nzira ya Hormuz ifungwa mu buryo bukomeye, nyamara inyuzwamo hafi icya gatanu cya peteroli na gaz bikoreshwa ku isi hose, ibintu byateje ikibazo gikomeye mu bijyanye na peteroli kuva mu myaka ya 1970.
Kugeza ubu, abantu barenga 2,000 bamaze kugwa muri iyi ntambara yatangijwe na Amerika na Israel ku wa 28 Gashyantare, yahungabanyije kandi amasoko y’imari, inateza izamuka rikabije ry’ibiciro bya lisansi, inongera impungenge z’izamuka ry’ibiciro ku isi, ndetse igahungabanya ubufatanye bw’ibihugu byo mu Burengerazuba bw’Isi.
Kuri iki Cyumweru, iterabwoba ryo gutera ibikorwa by’amashanyarazi byo mu karere ka Gulf ryateje impungenge ko hashobora kubaho guhagarara kw’ibikorwaremezo bitunganya amazi yo kunywa.
Abayobozi ba Amerika na Israel bavuga ko nyuma y’ibyumweru bitatu batangiye ibitero kuri Iran, byagabanyije cyane ubushobozi bwayo mu bya misile, nubwo Leta ya Tehran ikomeje kugaragaza ko igifite ubushobozi bwo kwihimura ku bitero ikomeje kugabwaho.
Shemsa UWIMANA
RADIOTV10
