Guverinoma ya Botswana yavuze ko nta kirihuko rusange cyagenewe abafana ba Arsenal nyuma yuko hagiye itangazo ryacuzwe ryavugaga ko abakunzi b’iyi kipe muri iki Gihugu bahawe konji ngo bishimire kwegukana igikombe cya shampiyona.
Nyuma yuko ikipe ya Arsenal yegukanye igikombe cya Shampiyona y’umwaka w’imikino wa 2025-2026 nyuma yuko ikipe ya Manchester City amahirwe yayo arangiye burund, muri Botswana hari hakwirakwiye itangazo ryacuzwe, ryavugaga ko abakunzi b’iriya kipe bahawe ikiruhuko rusange kuri uyu wa Gatatu.
Mu butumwa bunyomoza iri tangazo, ku rubuga nkoranyambaga rwa X, Guverinoma ya Botswana yamaganiye kure iri tangazo igira iti “Oya, nta kiruhuko gihari ku bafana ba Arsenal.” Ubundi igaragaza ko iri tangazo ari iricurano [fake].
Urwenya rw’iryo tangazo ry’impimbano rwateje impaka zidasanzwe ku mbuga nkoranyambaga muri Botswana, aho ibihumbi by’abantu babivuzeho byinshi.
Impaka zikunze kuzamuka cyane muri Afurika ku mbuga nkoranyambaga kubera shampiyona y’u Bwongereza dore ko amakipe yo muri iki Gihugu afite abakunzi batari bacye kuri uyu Mugabane.
Nyuma yuko ikipe ya Arsenal yegukanye igikombe cya Shampiyona, abakunzi b’andi makipe nk’aba Manchester City, aba Manchester United, Chelsea na Liverpool, bakomeje kugaragaza ko batishimiye iyi kipe bafata nka mucyeba yegukanye igikombe.
Ni mu gihe abakunzi ba Arsenal bo bari mu byishimo bari bamaze igihe batabona, dore ko yaherukaga kwegukana iki Gikombe mu myaka 22 ishize.
RADIOTV10
