Guverinoma ya Tanzaniya yohereje abasirikare n’abapolisi benshi i Dar es salaam, no mu yindi mijyi minini, ngo bajye gukumira imyigaragambyo iteganyijwe kubera muri gihugu, ishingiye ku makimbirane yaturutse ku matora yo mu mwaka ushize.
Ibyo bibaye nyuma y’aho mu cyumweru gishize, guverinoma ya Tanzaniya, yari yatangaje ko yahagaritse ibikorwa byose by’imitwe ya politiki, ivuga ko yabitewe n’impungenge z’umutekano, ariko ntiyasobanuye igihe iryo tegeko rizamara rikurikizwa.
Urubyiruko ruri gutegura iyo myigaragambyo rwatangaje ko ruzahurira mu mihanda ku wa 7 Nyakanga, rusaba impinduka muri demokarasi ndetse n’ubutabera ku bantu bishwe mu mvururu zakurikiye amatora yo mu mwaka ushize.
Komisiyo yashyizweho na guverinoma yagaragaje ko nibura abantu 518 bapfuye, baguye muri izo mvururu, ariko amashyaka atavuga rumwe n’ubutegetsi hamwe n’imiryango ishingiye ku madini bavuga ko inzego z’umutekano zishe abantu babarirwa mu bihumbi.
Iyi myigaragambyo yabaye umwaka ushije, yatewe ahanini no kutemerera abakandida bakomeye batavuga rumwe n’ubutegetsi kwiyamamaza mu matora, yaje gutsindwa na perezida Samia Suluhu Hassan, watangajwe ko yatsinze ku majwi hafi 98%.
Perezida Samia yavuze ko iyo myigaragambyo yari igamije guhirika ubutegetsi bwe, mu gihe guverinoma ye yahakanye ibirego by’imiryango iharanira uburenganzira bwa muntu ivuga ko inzego z’umutekano zakoresheje ingufu z’umurengera mu kuyihagarika.
Iyi myigaragambyo y’urubyiruko iteganyijwe mu cyumweru gitaha, ikaba izahurirana n’imurikagurisha mpuzamahanga rya dar es salaam international trade fair ritegurwa na leta ya Tanzaniya.
RADIOTV10
