Inzego z’ubuzima muri Repubulika Iharanira Demokarasi ya Congo zatangaje icyorezo cya Ebola cyagaragaye mu Ntara nshya, ndetse n’umubare w’abo kimaze kwica ukaba wageze kuri 600.
Iki cyorezo cya Ebola muri Congo, cyatangajwe ku ya 15 Gicurasi, kugeza ubu kikaba kimaze kugera ku bantu 1 759 mu Ntara zo mu burasirazuba bw’iki Gihugu, za Ituri, Kivu ya Ruguru na Kivu y’Epfo, nk’uko raporo ya Guverinoma iheruka gutangaza ku bijyanye n’amakuru kuri iki cyorezo.
Gusa uyu mubare w’abamaze kwandura, nturimo abantu bashya babiri basanganywe iyi ndwara i Kisangani umurwa mukuru w’intara ya Tshopo ikaba n’umwe mu mijyi minini muri Congo, nk’uko raporo ivuga.
Umwe mu basanganywe iki cyorezo, birakekwaho yaba yarayikuye mu muri Niania mu Ntara ya Ituri, aho abanduye ba mbere bagaragaye, mu gihe uwa kabiri w’i Kisangani “bisa nk’aho nta sano bifitanye” nk’uko byatangajwe.
Aba barwayi bashya bagaragaye, bari mu nzira yo kwemezwa ku mugaragaro, na bo bagashyirwa mu giteranyo cy’abamaze kwandura iki cyorezo bose muri Congo.
Amatsinda ashinzwe ubutabazi yatangiye kongera imbaraga mu kugenzura, gukurikirana abahuye n’abanduye n’izindi ngamba zo gukumira ko iki cyorezo cyakwirakwira cyane i Kisangani, nk’uko byatangajwe.
RADIOTV10