Ambasaderi w’u Rwanda mu Bushinwa, Lt Gen (Rtd) Emmanuel Karenzi Karake, yakiriye ikipe ya RSSB Tigers ku cyicaro cya Ambasade y’u Rwanda i Beijing, nyuma yo guhagararira u Rwanda n’Umugabane wa Afurika mu irushanwa rya FIBA Intercontinental Cup 2026.
RSSB Tigers yitabiriye iri rushanwa nyuma yo kwegukana igikombe cya Basketball Africa League (BAL) 2026, bikayiha amahirwe yo guhagararira Afurika mu irushanwa rihuza amakipe akomeye aturutse ku migabane itandukanye.
Mu kwakira iyi kipe, Ambasaderi Karenzi Karake yashimiye abakinnyi n’abatoza ba RSSB Tigers ku mikinire yabo, ndetse no kudacika intege mu mikino bakinnye.
Ambasade y’u Rwanda mu Bushinwa yavuze ko “Ambasaderi yashimiye ikipe ku bw’imikinire myiza, gukorana imbara no kwiyemeza, ashima imbaraga zayo zo guhatana n’umurava kugeza ku munota wa nyuma.”
Yashimangiye ko iyi kipe yagaragaje umwuka wo guhangana kugeza ku munota wa nyuma w’imikino, mu irushanwa ryabereye i Beijing.
RSSB Tigers yasoreje ku mwanya wa kane muri FIBA Intercontinental Cup 2026, nyuma yo gutsindwa na Boca Juniors yo muri Argentine mu mukino wo guhatanira umwanya wa gatatu wabaye ku wa 27 Nzeri 2026 i Beijing.
Nubwo itabashije kubona umwanya wa gatatu, RSSB Tigers yabaye ikipe ya mbere yo mu Rwanda yitabiriye iri rushanwa rihuza amakipe ahagarariye Imigabane itandukanye ku Isi.
Kwitabira iri rushanwa byakurikiye umusaruro mwiza w’iyi kipe mu mwaka wa 2026, aho yegukanye igikombe cya BAL, bityo ihabwa amahirwe yo guhagararira Afurika ku rwego mpuzamahanga.
RADIOTV10