Umunyamerika Brandon McNulty yegukanye Shampiyona y’Isi mu mukino wo gusiganwa ku Magare UCI, mu isiganwa ry’abagabo bakuru (Men Elite Road Race), nyuma yo gutsinda isiganwa rikomeye ryabereye i Montréal muri Canada.
McNulty w’imyaka 28 yakoresheje amasaha 6, iminota 17 n’amasegonda 4 ku ntera ya kilometero 273.4. Yatandukanye n’abari bamukurikiye mu birometero bya nyuma, abasha kugumana umwanya wa mbere kugeza ku murongo usoza isiganwa.
Umwanya wa kabiri wegukanywe n’Umunya-Australia Michael Matthews, naho Umunya-Pays-Bas Mathieu van der Poel afata umudali wa bronze. Bombi basizwe na McNultyho amasegonda 13.
Abakinnyi batatu ba mbere:
🥇 Brandon McNulty 🇺🇸
🥈 Michael Matthews 🇦🇺
🥉 Mathieu van der Poel 🇳🇱
Iyi ntsinzi yahesheje Leta Zunze Ubumwe za Amerika Shampiyona y’Isi mu isiganwa ry’abagabo nyuma y’imyaka 33, kuva Lance Armstrong ayegukana mu 1993. McNulty abaye Umunyamerika wa gatatu wegukanye iri rushanwa, nyuma ya Greg LeMond na Armstrong.
McNulty yahise yambara umwambaro w’amabara y’umukororombya (rainbow jersey) uzajya umuranga nk’Umukinnyi w’Isi mu mwaka utaha w’amarushanwa y’amagare.
Sosthene NKURUNZIZA
RADIOTV10