Wednesday, November 18, 2026
RW|EN
MU RWANDA

Minisitiri w’Ingabo mu Rwanda n’Umuvugizi wa RDF Brig.Gen. Karurerwa bari mu Bubiligi

Minisitiri w’Ingabo mu Rwanda n’Umuvugizi wa RDF Brig.Gen. Karurerwa bari mu Bubiligi

Minisitiri w’Ingabo mu Rwanda, Juvenal Marizamunda, ari mu Bubiligi aho yitabiriye inama mpuzamahanga ya Schuman Forum on Defence and Security 2026, ihuriza hamwe abayobozi n’impuguke mu by’umutekano n’ingabo baturutse mu Bihugu bitandukanye.

Minisiteri y’Ingabo mu Rwanda yatangaje ko iyi nama iri kubera i Bruxelles, mu Bubiligi, ifite insanganyamatsiko igira iti “Ubufatanye bwizewe mu by’umutekano n’ubwirinzi mu bihe bigaragaza impungenge z’umutekano muke.”

Iyi nama yitabiriwe n’Ibihugu bisaga 80 n’imiryango mpuzamahanga 10, ikaba igamije kuganira ku bibazo by’umutekano n’ubwirinzi ku rwego mpuzamahanga, ndetse no gushimangira ubufatanye mu guhangana n’ibibazo byugarije Isi.

Minisitiri Marizamunda yitabiriye iyi nama ari kumwe na Ambasaderi w’u Rwanda mu Bubiligi, Igor César, na Brig Gen Patrick Karuretwa, Umuvugizi w’Ingabo z’u Rwanda (RDF).

Mu biganiro by’iyi nama, Minisitiri Marizamunda yasangije abayitabiriye uko u Rwanda ruhagaze ku ngingo zitandukanye zijyanye n’umutekano, zirimo ubufatanye mu bya gisirikare, kurwanya iterabwoba no kubungabunga amahoro.

Minisitiri Marizamunda kandi yanahuye na Patricia Llombart, Umuyobozi Mukuru ushinzwe Afurika mu Rwego rw’Umuryango w’Ubumwe bw’u Burayi rushinzwe ibikorwa by’ububanyi n’amahanga.

Mu butumwa bwe, Patricia Llombart yatangaje ko yagiranye ibiganiro by’ingirakamaro na Minisitiri w’Ingabo w’u Rwanda, Juvenal Marizamunda.

Yavuze ko amahoro n’umutekano mu karere k’Ibiyaga Bigari, muri Afurika no ku Isi muri rusange ari ingenzi, ashimangira ko Umuryango w’Ubumwe bw’u Burayi ukomeje gushyigikira ibikorwa bigamije kubigeraho.

Yagize ati “Amahoro n’umutekano mu Karere k’Ibiyaga Bigari, muri Afurika no ku Isi hose ni iby’ingenzi. Umuryango w’Ubumwe bw’u Burayi ukomeje kubishyigikira no kugira uruhare mu kubigeraho.”

Iyi nama ya Schuman Forum on Defence and Security ni urubuga ruhuza ibihugu n’imiryango mpuzamahanga kugira ngo biganire ku mikoranire mu by’umutekano n’ubwirinzi, cyane cyane mu gihe Isi ikomeje guhura n’ibibazo bitandukanye by’umutekano muke.

RADIOTV10

Sangira: Facebook Twitter WhatsApp

Leave a Reply

Your email address will not be published. Required fields are marked *

sixteen + sixteen =