Abafatanyije na Gitwaza gushinga Zion Temple bamweguje, RGB ibitera utwatsi

Abagize inama y’abashinze Umuryango Authentic Word Ministries/ Zion Temple Celebration Center, banditse ibaruwa yo kweguza Apotre Dr Gitwaza, bamushinja ibirimo kunyereza umutungo, mu gihe Urwego rw’Igihugu rw’Imiyoborere (RGB) rwatesheje agaciro iki cyemezo kuko cyafashwe n’abatabifitiye ububasha.

Ibaruwa y’aba- Bishop batandatu bigaragara ko yanditswe tariki 14 Gashyantare 2022, yandikiwe Apotre Dr Paul Gitwaza imumenyesha ko akuwe ku mwanya w’uyu muryango.

Izindi Nkuru

Amafoto utabonye: Perezida Kagame yongeye gushimangira ko akunda Siporo anagaragarizwa urugwiro ruhebuje

29/05/2023

Mu Birunga hari agahinda ku bw’Ingagi yari ikuze kurusha izindi mu Rwanda

29/05/2023

Mu mpamvu zigaragara muri iyi baruwa, aba bayobozi bo muri uyu muryango, bashinja Gitwaza gufata imyanzuro ku giti cye ndetse no gusesagura umutungo.

Igika cya kabiri cy’iyi baruwa, kivuga ko Paul Gitwaza “waranzwe n’ibikorwa bigayitse byo kunyereza imitungo unyuranye yawo no kugurisha iyindi, imwe mukayikoresha mu nyungu zanyu bwite ndetse indi muyimurira mu mahanga bidakurikije amategeko shingiro y’umuryango ndetse nta rwego na rumwe mugishije inama cyane cyane twebwe twashinganye namwe.”

Iyi baruwa igenda igaragaza ibikorwa byinshi bishinjwa Apotre Paul Gitwaza, isoza ivuga ko guhera kuri iyi tariki yandikiwe [14 Gashyantare 2022] “ukuwe ku buyobozi bw’umuryango twagushinze n’inshingano zose zijyanye n’umwanya wari ufite mu muryango Authentic Word Ministries/ Zion Temple Celebration Center kubera imiyoborere n’imikorere mibi wagaragaje mu buyobozi bwawo.”

Ibaruwa yasakaye kuri kuri uyu wa Gatandatu, mu gihe RADIOTV10 yahise ibona urundi rwandiko rw’Urwego rw’Igihugu rushinzwe imiyoborere RGB, rw’icyemezo cyafashwe kuri uyu wa Gatanu tariki 18 Gashyantare 2022.

Iki cyemezo kigaragaza ingingo z’amategeko yisunzwe, gitesha agaciro iriya baruwa yandikiwe Apotre Paul Gitwaza.

Iki cyemezo cyashyizweho umukono n’Umuyobozi Mukuru wa RGB, Dr Usta Kaitesi, kigira kiti “Ndabamenyesha ko “(1) Icyemezo mwafashe nta shingiro gifite kuko mutari mu nteko rusange ari rwo rwego rw’umuryango rufite ububasha bwo gufata icyo cyemezo. (2) mugomba guhagaruka ibikorwa byo kwihesha ububasha mudafite n’ibindi byose bishobora guteza umutekano mucye mu bunyamuryango n’abakristo ba Authentic Word Ministries/ Zion Temple Celebration Center.”

Bamwe mu bazi ibibazo byo muri iri torero risanzwe ryitirwa Apotre Gitwaza, bavuga ko atari ibya vuba aha ndetse ko hari abagerageje kumukura ku mwanya afite muri iri torero ariko bikanga.

RADIOTV10