Ubuyobozi bw’Ikipe y’Ingabo z’u Rwanda, APR FC bwakoresheje ibizamini by’ubuzima abakinnyi bayo, birimo iby’imikorere y’umutima n’isuzuma ry’ibiyobyabwenge mu mubiri.
Byatangajwe n’Ubuyobozi bwa APR kuri uyu wa Kabiri tariki 14 Nyakanga 2026 ko abakinnyi b’iyi kipe bakorewe isuzuma rinyuranye. Ni igikorwa cyakorewe mu bitaro bikuru bya Gisirikare i Kanombe.
Ubuyobozi bw’iyi kipe, bwavuze ko “abakinnyi b’ikipe ya APR FC bapimwe indwara n’ibipimo bitandukanye by’ubuzima birimo umuvuduko w’amaraso, imikorere y’umutima, isuzuma ry’ibiyobyabwenge mu mubiri, ndetse n’ibindi bipimo by’ingenzi bigamije kumenya uko ubuzima bwabo buhagaze.”
Ubuyobozi bwa APR buvuga ko iki ari igikorwa gisanzwe gikorwa buri mwaka mbere y’uko umwaka w’imikino utangira, hagamijwe kwemeza ko abakinnyi bose bafite ubuzima buzira umuze bubafasha gutangira imyitozo n’amarushanwa.
RADIOTV10