Ihuriro AFC/M23 rirwanya ubutegetsi bwa Repubulika Iharanira Demokarasi ya Congo, ryamaganiye kure raporo y’Umuryango Mpuzamahanga Uharanira Uburenganzira bwa Muntu HRW, ishinja iri Huriro n’Ingabo z’u Rwanda ibinyoma birimo ibikorwa bibangamira abasivile mu burasirazuba bwa DRC, no gushyira abana mu gisirikare.
Uyu muryango wakunze gushinja u Rwanda ibinyoma bitanafitiwe gihamya, wongeye gusohora raporo ushinja Ingabo z’u Rwanda n’ubundi ibikorwa bihabanye n’ukuri, birimo ngo ibyo zakoze zifatanyije na AFC/M23 mu burasirazuba bwa Repubulika Iharanira Demokarasi ya Congo.
U Rwanda rwakunze kugaragaza ko amakuru rutangazwaho n’uyu Muryango Human Rights Watch ari ibinyoma biba bifite impamvu za poliriki zibyihishe inyuma.
Minisitiri w’Ububanyi n’Amahanga n’Ubutwererane, Amb. Olivier Nduhungirehe, yabwiye BBC Gahuza ko Guverinoma y’u Rwanda itajya isubiza Raporo z’uyu muryango kubera ibinyoma ziba zuzuyemo. Yagize ati “Ntitujya dusubiza HRW.”
Ihuriro AFC/M23, mu itangazo ryashyize hanze n’Umuvugizi waryo, Lawrence Kanyuka kuri uyu wa Gatatu tariki 10 Kamena 2026, ryamaganiye kure iyi raporo nshya ya HRW yiswe ‘Death was everywhere’ cyangwa se ngo ‘Urupfu ruri hose’, rivuga ko amakuru ayikubiyemo ahabanye n’ukuri kandi abogamye.
Iri Huriro rivuga ko uyu Muryango wongeye kuryibandaho, nyamara ukirengagiza amarorerwa akomeje gukorwa n’ingabo z’abahuzamugambi z’ubutegetsi bwa Kinshasa.
Kanyuka yavuze ko nk’ibirego byo gushinja iri Huriro gushyira mu gisirikare abana ku ngufu, ari ikinyoma gikomeye, kuko ryagiye rihamagarira kenshi kandi “ku mugaragaro nta banga, no mu matangazo yanditse, mu mashusho bigaragarira buri we” byo guhamagarira abantu kujya mu gisirikare cyaryo ku bushake.
Iri huriro rivuga ko ahubwo ubutegetsi bwa Kinshasa ari bwo bushyira mu gisirikare abana, kuko hagaragaye “amashush kenshi yerekana abana bambaye impuzankano z’igisirikare cy’ubutegetsi bwa Kinshasa.”
Kanyuka kandi yavuze ko uru ruhande rwa Leta ya Kinshasa ari rwo rukomeje kurangwa n’ibikorwa bihitana inzirakarengane nyinshi z’abasivile, mu bitero by’ibisasu byagaragajwe kenshi mu mashusho yerekana ahagiye haba ibi bikorwa byumwihariko mu bice bya Masisi na Minembwe, byibasiwe cyane muri ibi bihe.
Kanyuka ati “Nyamara, ibi bikorwa bisa nk’aho bititabwaho cyane muri raporo za Human Rights Watch no mu bikorwa bivugwa mu itangazamakuru.”
Kanyuka yavuze ko umuryango uwo ari wo wose uharanira uburenganzira bwa muntu ukwiye gukoresha amahame yemewe y’iperereza, n’amagenzura, kandi hakarebwa ku mpande zose, aho kubogama hagendewe ku mpamvu za politiki.
RADIOTV10
