Mu byaha biregwa umunyamakuru Sengabo Jean Bosco uzwi nka Fatakumavuta, hiyongereyeho icyo gukoresha ibiyobyabwenge, nyuma yuko isuzuma rigaragaje ibipimo biri hejuru ko mu mubiri we birimo.
Aya makuru yemejwe n’Urwego rw’Igihugu rw’Ubugenzacyaha RIB, nk’uko byatangajwe n’Umuvugizi warwo, Dr Murangira B. Thierry.
Urwego rw’Igihugu rw’Ubugenzacyaha rwari rwatangaje ko Fatakumavuta akurikiranyweho icyaha cyo kubuza undi amahwemo hifashishijwe imbuga nkoranyambaga, n’icyo gukoresha imvugo ziremereye zikurura amacakubiri mu bantu.
Kuri uyu wa Kabiri tariki 22 Ukwakira, Dr Murangira B. Thierry yatangaje mu byaha bikurikiranywe kuri uyu mugabo, hiyongereyeho n’icyo gukoresha ibiyobwenge, anavuga uburyo byamenyekanye.
Yagize ati “Twaje kumupimisha ibiyobyabwenge dusanga akoresha urumogi, ibisubizo by’abahanga bigaragaza ko afite igipimo cya 298 mu gihe igipimo gisanzwe ari hagati ya 0 na 20.”
Fatakumavuta, yatawe muri yombi nyuma yuko yakunze kugaragara mu biganiro atangira ku mbuga nkoranyambaga nka YouTube, akoresha amagambo akomeye kuri bamwe mu basanzwe bazwi mu myidagaduro.
Nanone kandi ubwe yigeze kuvuga ko yagiye ahamagazwa kenshi na RIB, kugira ngo yisobanure ku byo yabaga yatangaje, ariko ko yamaze gufata icyemezo ko atazongera kwitaba, ahubwo ko azategereza uru rwego rukajya kumwifatira.
Urwego rw’Igihugu rw’Ubugenzacyaha na rwo rwemeza ko uyu mugabo yagiye ahamagazwa kenshi, akagirwa inama kugira ngo ahagarike ibikorwa bigize ibyaha byumvikanaga mu biganiro bye, ariko akinangira, kugeza ubwo hafashwe icyemezo cyo gukoresha imbaraga z’amategeko.
Dr Murangira yari aherutse kugira ati “Afashwe nyuma y’igihe kirekire yarihanangirijwe, yaragiriwe inama, yarigishijwe ariko ahitamo kwinangira. Ikigomba gukurikizwa rero nta kindi uretse kuba amategeko agomba gukurikizwa.”
Umuvugizi wa RIB kandi yanagiriye inama abakoresha imbuga nkoranyambaga n’abakora mu ruganda rw’imyidagaduro kutumva ko bari mu Isi yabo, ngo babyitwikire bakore ibikorwa bigize ibyaha, kuko inzego z’ubutabera na zo ziba ziri maso, kandi na bo zibareba.
RADIOTV10
