Abasirikare basoje imyitozo yisumbuye izwi nka ‘Advanced Infantry Training’, bagaragaje imwe muri iyo irimo kurwanisha intwaro ndetse n’umubiri mu mirwano njyarugamba.
Aba basirikare ba RDF, basoje iyi myitozo kuri uyu wa Gatatu tariki 17 Mutarama 2024 mu Ishuri rya Gisirikare rya Nasho Basic Military Training Center riherereye mu Karere ka Kirehe.
Umuhango wo gusoza iyi myitozo wayobowe n’Umugaba Mukuru w’Ingabo z’u Rwanda, General Mubarakh Muganga wari kumwe n’abandi basirikare bakuru muri RDF.
Ubwo hasozwaga iyi myitozo, aba basirikare bagaragaje imwe mu yo batojwe, irimo kumasha, kurwana urugamba bifashishije intwaro ndetse no kwirwanaho mu buryo bw’imbaraga z’umubiri.
General Mubarakh Muganga yasabye aba basirikare kuzakomeza kurangwa n’ikinyabupfura ndetse abibutsa ko iyi myitozo igomba kubafasha kuzuza inshingano za RDF, zo kurinda Igihugu n’Abanyarwanda no kuzuza ubutumwa bwose Ingabo z’u Rwanda zoherezwamo.
RADIOTV10
