Guverineri w’Intara ya Ituri muri Repubulika Iharanira Demokarasi ya Congo, yagaragarije itangazamakuru intwaro 29 zatahuwe hafi y’inkambi icumbikiwemo abavanywe mu byabo n’imirwano.
Iki gikorwa cyo kwerekana izi ntwaro cyabaye kuri uyu 23 Nzeri 2024, cyanitabiriwe na Minisitiri Wungirije w’Umutekano wa Congo, Samy Adubango.
Izi ntwaro zerekanywe nyuma y’iminsi ine hatahuwe ububiko bw’izi ntwaro bwari hafi y’inkambi y’abavanywe mu byabo n’imirwano muri Nyasasi muri Tchomia mu bilometero bigera muri 60 ubuye muri Bunia.
Guverineri w’Intara ya Ituri, Luboya yatangaje ko izi ntwaro zatahuwe, ari iz’umutwe witwaje intwaro wa Zaïre, uherutse kugaba ibitero byinshi ku birindiro bya FAEDC muri Teritwari ya Djugu byakozwe mu kwezi gushize kwa Kanama.
Guverineri yavuze ko abarwanyi b’uyu mutwe bagabye ibitero mu birindiro bya FARDC, babaga bari kumwe na bamwe mu bakomoka hanze y’iki Gihugu cya Congo, aho bagabye ibitero mu duce twa Sabe, Tchomia na Kasenyi, ndetse abasirikare ba FARDC barimo ufite ipeti rya Majoro, uw’irya Lieutenant ndetse n’abandi basirikare babiri, babyiciwemo.
Guverineri yavuze ko gutahura izi ntwaro za Zaïre, byagizwemo uruhare n’abaturage bafatanyije n’Igisirikare cya Congo.
Yagize ati “Muri icyo gitondo twakomeje gukurikirana umwanzi wacu (abarwanyi ba Zaïre) bari bambutse muri Fichama na Bowa, aho bari bagiye kwisuganyiriza. Nyuma y’isesengura, twaje kumenya batari bagiye kure, kandi bamwe muri bo bari batangiye kwinjira mu nkambi y’abavuye mu byabo muri Nyamusasi.”
Yakomeje avuga ko nyuma yo gukusanya amakuru mu baturage, baje kugera mu gace aba barwanyi bari bahishemo izi ntwazo zerekanywe.
RADIOTV10
