- Yagaragaje impamvu muzi y’ibibazo byazonze DRC ihabanye n’ihora ivugwa n’ubutegetsi
Umunyapolitiki Matata Ponyo Mapon wabaye mu nzego zo hejuru muri Repubulika Iharanira Demokarasi ya Congo, nko kuba yarabaye Minisitiri w’Intebe, yavuze ko “nta kindi gihe iki Gihugu cyagize ubutegetsi bubi nk’ubwo gifite ubu” kandi ko ari na ryo zingiro ry’ibibazo by’umutekano byo mu burasirazuba bwacyo.
Matata Ponyo Mapon wabaye Minisitiri w’Intebe wa DRC hagati ya 2012 na 2016, yabitangaje mu kiganiro yagiranye na TV 5 Monde, cyagarukaga ku gitabo yashyize hanze yise ‘Politiki Economique dans un Pays en developpement’.
Uyu munyapolitiki wahunze Igihugu cya DRC umwaka ushize, yagarutse ku butabera bwa Congo bwamukurikiranyeho ibyaha byo kunyereza umutungo, avuga ko uru rwego rwa kiriya Gihugu rurwaye ku buryo n’ibyo rwakora byose bitari mu murongo muzima.
Yavuze ko Itegeko Nshinga rya kiriya Gihugu rihonyorwa n’ubutegetsi buriho bwa Felix Tshisekedi, bugakandamiza abo butifuza baba bashaka kugaragaza ibitagenda.
Avuga ko ku giti cye yanze gukorana n’ubutegetsi bwa Tshisekedi kubera inenge nyinshi abubonaho, kandi ko atari akwiye kubizira.
Ati “Ngendeye ku cyubahiro cyanjye, ku bunyangamugayo bwanjye, ntabwo nshobora gukorana n’ubutegetsi bwijanditse mu gusahura umutungo w’Igihugu no muri ruswa.”
Uyu munyapolitiki, avuga ko Perezida Tshisekedi ubwe, ari we wari inyuma ya biriya byaha avuga ko yegetsweho, kandi ko ubutegetsi bw’uyu Muperezida bwakomeje kurangwa n’imyitwarire n’imigirire mibi yo gushaka kwigizayo abatavuga rumwe na bwo.
Nta kindi gihe Congo yayobowe nabi nk’uko iyobowe ubu
Agaruka ku bibazo by’umutekano bimaze igihe mu burasirazuba bwa Repubulika Iharanira Demokarasi ya Congo, Matata Ponyo Mapon yavuze ko kuba Ihuriro AFC/M23 ryarafashe umujyi wa Goma ritsinze igisirikare cya Leta ya Congo, bigaragaza ko gutsinda intambara bisaba kugira igisirikare gifite imyitwarire myiza, ndetse n’imiyoborere ihamye.
Yavuze ko iyo abantu bagiye gusuzuma ikibazo cy’umutekano mu burasirazuba bwa DRC, bareba gusa ku mutwe wa AFC/M23, ariko bakirengagiza icyatumye ubaho.
Ati “Abantu bareba gusa ku mutwe. Ariko se ni ibihe bibazo muzi byatumye habaho uyu mutwe? Ni imiyoborere mibi, nta kindi gihe RDC yigeze ibaho iyobowe nabi nk’uko iyobowe ubu.”
Matata Ponyo Mapon avuga ko muri kiriya gitabo cye, agaragaza ko umuzi w’ibibazo byo muri Congo, ari ikijyanye n’imiyoborere mibi.
Ati “Ntabwo wagira Igihugu cy’ingengo y’imari ya Miliyari eshanu z’amadolari, igihe nari Minisitiri w’Intebe, imishahara yarishyurwaga tariki 15 za buri kwezi, imihanda yarubakwaga, ibigo by’ubucuruzi byaravukaga, kompanyi z’ubwikorezi bwo mu kirere, kompanyi zitwara abagenzi mu buryo bwa rusange, ariko noneho ku ngengo y’imari ya miliyari zikabakaba 16, imihanda yose yarangiritse, kompanyi zirajegajega, abantu ntibagihembwa, amafaranga aribwa…”
Yakomeje avuga ko amasezerano n’ibiganiro bikomeje gukorwa mu gushaka umuti wa biriya bibazo, byose byari bikwiye gushingira ku muzi wabyo.
Yavuze ko we na Joseph Kabila wayoboye Congo, bagerageje gutanga umusanzu mu gushaka umuti wa biriya bibazo, bagaragaza ikibazo nyacyo cya DRC.
Ati “Twaberetse ko ikibazo cya RDC atari ikibazo cy’ivuka ry’imitwe yitwaje intwaro. Wagakwiye kwibaza ikibazo uti ‘ese ni uwuhe muzi w’ivuka ry’umutwe witwaje intwaro?’ ni ikibazo cy’imiyoborere mibi yabaye karande, imiyoborere ishingiye mu by’ukuri ku cyenewabo, ku bwoko, ishingiye ku bushuti…”
Avuga ko iterambere ry’ubukungu rifatika muri Congo kimwe n’ibindi Bihugu byo muri Afurika biri mu nzira y’amajyambere, rigomba gushingira ku miyoborere myiza, ariko ko ikibazo ari uko uyu Mugabane udafite iyo miyoborere.
RADIOTV10
