Ishyirahamwe ry’Umukino wa Basketball mu Rwanda (FERWABA) ryakuyeho ibihano byo guhagarika abakinnyi b’Ikipe y’Igihugu, Ntore Habimana na Mpoyo Axel Olenga, bari bahagaritswe umwaka wose, nyuma yo kwanga kwitaba ubutumire bw’Ikipe y’Igihugu.
Ikurwaho ry’ibi bihano, rikubiye mu itangazo rigenewe itangazamakuru ryashyizwe hanze na FERWABA kuri uyu wa Gatanu tariki 10 Nyakanga 2026.
Muri iri tangazo Ishyirahamwe ry’umukino wa Basketball mu Rwanda (FERWABA) rivuga ko ryifuza “kumenyesha abaturage ko nyuma yo kwakira no gusuzuma amabaruwa yo gusaba imbabazi yatanzwe na APR Basketball Club, Bwana Ntore Habimana na Bwana Mpoyo Axel Olenga ndetse n’inama yahuje FERWABA na APR Basketball Club ku ya 08 Nyakanga 2026, ryiyemeje kwakira imbabazi no gukuraho, byihuse ihagarikwa ry’ibihano ryari ryarafatiwe Bwana Ntore Habimana na Bwana Mpoyo Axel Olenga.”
FERWABA ivuga ko iki cyemezo cyafashwe nyuma yo gusuzuma ingamba zo gukosora zashyizweho na APR Basketball Club ndetse n’umuhate wo kubahiriza ihamagarwa ry’abakinnyi mu Ikipe y’Igihugu no gusohoza inshingano zabo mu buryo buboneye.
Iri shyirahamwe risoza rivuga ko ryongeye gushimangira ko guhagararira u Rwanda ari ishema ryo gukunda Igihugu, birangwa n’imyitwarire myiza no gukora cyane mu gushyira imbere inyungu z’Igihugu.
Icyemezo cyo guhagarika aba bakinnyi, cyari cyatangajwe tariki 22 Kamena 2026, aho FERWABA yavugaga ko yahagaritse abakinnyi Ntore Habimana na Axel Olenga Mpoyo mu bikorwa bya Basketball kuko bari banze kwitaba ubutumire bw’Ikipe y’Igihugu ubwo yitegura imikino yo gushaka itike y’Igikombe cy’Isi.
Muri iyi mikino yiswe ‘FIBA Basketball World Cup African Qualifiers’ u Rwanda ruherutse kwitabira i Luanda muri Angola, rwavuyeyo nta mukino n’umwe rutsinze.
RADIOTV10