Intumwa z’Umuryango w’Ingabo Zihora ziteguye Gutaba mu Karere ka Afurika y’Iburasirazuba (Eastern Africa Standby Force-EASF), zagiriye uruzinduko mu Rwanda rugamije ibirimo kugenzura ibikorero by’ingabo zirwanira mu kirere, RDF yiyemeje gutanga.
Ni uruzinduko rwabaye kuri uyu wa Kane tariki 22 Mutarama 2026 nk’uko byatangajwe n’Ubuyobozi Bukuru bw’Ingabo z’u Rwanda.
Ubuyobozi Bukuru bwa RDF buvuga ko “intumwa z’Umuryango w’Ingabo zihora ziteguye gutabara mu Karere ka Afurika y’Iburasirazuba (EASF), ziyobowe na Brig Gen Getachew Ali, Umugaba Mukuru w’Ingabo za EASF, zasuye icyicaro gikuru cya Minisiteri y’Ingabo giherereye Kimihurura.”
Ubwo izi ntumwa zasuraga Icyicaro Gikuru cya RDF, zakiriwe na Brig Gen Godfrey Gasana, Umugaba wungirije w’Ingabo z’u Rwanda zirwanira mu Kirere, wazakiriye mu izina ry’Umugaba Mukuru w’Ingabo z’u Rwanda.
RDF ivuga ko “Uru ruzinduko rwari rugamije kugenzura ibikoresho by’Ingabo zirwanira mu kirere, RDF yiyemeje gutanga, mu rwego rw’imbaraga EASF ikomeje gushyira mu gutegura igitabo ngenderwaho cy’ibikorwa bihuriweho bijyanye n’Ingabo zirwanira mu kirere bigamije ubutabazi.”
Izi ntumwa za EASF zimaze kwakirwa ku Cyicaro Gikuru cy’Ubuyobozi Bukuru bwa RDF, zasuye Urwibutso rwa Jenoside rwa Kigali ruruhukiyemo inzirakarengane zirenga ibihumbi 250 zishwe muri Jenoside yakorewe Abatutsi mu 1994, baboneraho no kuzunamira.
RADIOTV10
