Perezida wa Repubulika Iharanira Demokarasi ya Congo, Félix Tshisekedi nyuma yo gutumiza inama y’igitaraganya yahuje inzego zikomeye muri iki Gihugu kugira ngo zige ku biri kubera mu Mujyi wa Goma, hategerejwe ijambo ageza ku Banyekongo.
Iyi nama y’igitaraganya yatumijwe na Tshisekedi, yabaye ku mugoroba wo kuri uyu wa Mbere tariki 27 Mutarama 2025, umunsi wagaragaje isura yihariye mu rugamba rumaze igihe ruhanganishije igisirikare cya Leta ya Kinshasa n’umutwe wa M23.
Ni umunsi umutwe wa M23 watangarijeho ko wamaze gufata umujyi wa Goma, ufatwa nk’Umurwa Mukuru w’Intara ya Kivu ya Ruguru, ndetse waniriwemo imirwano, aho hari ibice bitarava mu maboko ya FARDC n’impande ziyifasha.
Kuri uyu wa Mbere tariki 27 Mutarama, i Kinshasa Perezida Félix Tshisekedi yatumije inama yamuhuje n’abayobozi mu nzego nkuru z’iki Gihugu cya DRC, bahuye ngo barebere hamwe iby’iki kibazo cy’i Goma.
Ni inama yitairiwe n’abayobora inzego enye zikomeye mu Gihugu, barimo Perezida w’Igihugu, ukuriye Guverinoma, Perezida w’Inteko Ishinga Amategeko, na Perezida w’Urukiko rw’Ikirenga.
Nyuma y’iyi nama, Perezida w’Inteko Ishinga Amategeko, Vital Kamerhe yagarutse kuri bimwe mu byigiwemo n’ibyanzuriwemo, aho yavuze ko nk’Intara ya Kivu ya Ruguru “Igomba kuyoborwa n’umuyobozi washyizweho na Perezida wa Repubulika.”
Vital Kamerhe yavuze ko nta byinshi yavuga ku byagariniweho muri iyi nama cyangwa imyanzuro yafatiwemo ngo kuko “Perezida wa Repubulika arageza ijambo ku Baturage.” Ry’ibyaganiriweho ndetse n’uko Igihugu kigomba kwitwara.
Uyu ukuriye Urwego rukomeye muri DRC, ntiyavuze igihe iri jambo rya Perezida Tshisekedi ritangirwa, gusa ibintu bikomeje kuba bibi mu mujyi wa Goma, ahakomeje kubera imirwano iri no guhitana inzirakarengane z’abasivile.
Kuri uyu wa Mbere, habarwa abantu 17 baguye i Goma bazize iyi mirwano, mu gihe abakomeretse barenga 300, ndetse benshi bakaba bakomeje guhungira mu Rwanda.
Ijambo rya Perezida Tshisekedi ritegerejwe mu gihe atitabira inama idasanzwe y’Abakuru b’Ibibihugu bigize Umuryango wa Afurika y’Iburasirazuba iba kuri uyu wa Kabiri, yiga ku bibazo by’umutekano biri mu burasirazuba bwa DRC.
Uyu mukuru w’Igihugu cya Congo, yakunze gutsemba ko adateze kugirana ibiganiro n’umutwe wa M23, mu gihe na wo wavuze ko udateze guhagarika imirwano igihe cyose ubutegetsi bwa Congo butemeye ko bagirana ibiganiro ngo bwubahirize ibyo usaba.
RADIOTV10
