Umugabo wo Mu Murenge wa Gahengeri mu Karere ka Rwamagana, ukurikiranyweho gusambanya umwana we w’umukobwa akamutera inda nyuma yuko umugore we ashatse undi mugabo, yemera icyaha akanavuga uko yabikoze.
Uyu mugabo ubu ukurikiranywe n’Ubushinjacyaha ku Rwego Rwisumbuye rwa Ngoma, dosiye y’ikirego cye yamaze gushyikirizwa Urukiko Rwisumbuye rwa Ngoma.
Ubushinjacyaha dukesha aya makuru, buvuga ko icyaha kiregwa uyu mugabo cyabaye muri Kamena umwaka ushize, kikabera mu Mudugudu w’Umunini mu Kagari ka Kanyangese, Umurenge wa Gahengeri mu Karere ka Rwamagana.
Ubushinjacyaha bugira buti “Kubera ko nyina w’uyu mwana yari yarashatse undi mugabo, uregwa yasambanyije uyu mwana inshuro nyinshi bigera n’aho amutera inda kuko ari we babanaga mu nzu. Inda yamuteye yaje kuvamo.”
Ubushinjacyaha bwamaze kugeza ikirego cyabwo mu Rukiko, bukomeza bugira buti “Uregwa yemera icyaha akurikiranyweho kandi agasobanuro uko yagikoze.”
ICYO ITEGEKO RITEGANYA
Ingingo ya 4 y’itegeko Nº 69/2019 ryo ku wa 08/11/2019 rihindura Itegeko nº 68/2018 ryo ku wa 30/08/2018 riteganya ibyaha n’ibihano muri rusange.
“Umuntu wese ukorera ku mwana kimwe mu bikorwa bishingiye ku gitsina bikurikira, aba akoze icyaha:
1 º gushyira igitsina mu gitsina, mu kibuno cyangwa mu kanwa k’umwana;
2 º gushyira urugingo urwo arirwo rwose rw’umubiri w’umuntu mu gitsina, cyangwa mu kibuno cy’umwana;
3 º gukora ikindi gikorwa cyose ku mubiri w’umwana hagamijwe ishimishamubiri.
Iyo abihamijwe n’urukiko, ahanishwa igifungo kitari munsi y’imyaka makumyabiri (20) ariko kitarenze imyaka makumyabiri n’itanu (25).
Iyo umuntu mukuru asambanyije umwana uri munsi y’imyaka cumi n’ine (14), igihano kiba igifungo cya burundu kidashobora kugabanywa kubera impamvu nyoroshyacyaha.
Iyo umuntu mukuru asambanyije umwana ufite cyangwa urengeje imyaka cumi n’ine (14) bigatera umwana indwara idakira cyangwa ubumuga, igihano kiba igifungo cya burundu.
RADIOTV10
