Ikipe ya Police FC izasohokera u Rwanda muri CAF Confederations Cup ikomeje kwiyubaka kugira ngo izaserukire u Rwanda yiteguye, ndetse ikaba yakiriye myugariro ukomoka mu gihugu cya Ghana gisanzwe kizwiho kuba gifite ruhago iri hejuru muri Afurika.
Mu rukerera rwo kuri uyu wa Kabiri, umusore ukomoka muri Ghana, Issa Yakubu yasesekaye mu Rwanda aho yari aturutse mu Gihugu cya Mali aho yakiniraga ikipe ya Stade Malien yo muri iki Gihugu.
Uyu musore uje gusinyira Police FC akaba yaragiye muri iyi kipe ya Stade Malien aturutse muri Dreams FC y’iwabo muri Ghana.
Issa Yakubu aje yiyongera ku munyezamu Niyongira Patience wasinye kuri uyu wa Mbere avuye mu ikipe ya Bugesera FC ndetse na Ani Elijah wavuye na we muri Bugesera, na we wamaze gusinyira iyi kipe y’igipolisi cy’u Rwanda.
Aba biyongera kandi kuri Ssenjoba Eric wavuye muri Uganda Revenue Authority (URA FC) akaba na we akina mu mutima w’ubwugarizi, ndetse na Muhadjiri Hakizimana wongereye amasezerano y’imyaka ibiri muri Police FC.
Jean Claude KANYIZO
RADIOTV10
