Korali Healing Worship Ministry yo mu Itorero ‘Power of Prayer Church’ yasabye andi makorali kurenga imyumvire y’amadini akajya yitabira ubutumire bw’ayo mu yandi matorero, nyuma yuko itumiye iyo Badivantisiti b’Umunsi wa Karindwi ariko ikangirwa kwitabira ubutumire.
Iyi korali ifite igitaramo cyiswe ‘Heal Fest’ kuri iki Cyumweru tariki 15 Kamena 2025, izafashwamo n’abahanzi nka Papi Claver, Ben na Chance, Dorcas ndetse na True Promesses.
Eric Sibomana, Umuyobozi wa Healing Worship Ministry, avuga ko bari banatumiye Korali ya Ambassador yo mu Itorero ry’Abadivantisiti b’Umunsi wa Karindwi, ndetse bizeye ko izaza, ariko biza kurangira yangiwe.
Ati “Twari twabatumiye ariko ntibyakunda, uretse ko na bo babyifuzaga, hari uburyo inzego z’Itorero ryabo zubakitse, rero ubwo twabatumiraga inzego zimwe zarabyemeye bigeze ku zo hasi ntibyakunda, ariko dufite icyizere ko hari umunsi bizakunda.”
Yakomeje asobanura ko kuri bo badafite idini bibandaho cyangwa Itorero mu buryo bwo kwamamaza ubutumwa, kuko abantu bose bakeneye kugerwaho n’ubutumwa bwiza.
Ati “Tube bamwe, andi matsinda bagenzi bacu baze tugerageze tuvuge ubutumwa budashingiye ku idini, dukorere hamwe abo tudahuje Itorero dushyire hamwe bizagira umumaro ku muryango Nyarwanda.”
Esther Fifi UWIZERA
RADIOTV10
