Madamu Jeannette Kagame yahaye umukoro abagore bagize Urugaga rushamikiye ku Muryango FPR-Inkotanyi wo kuba umusemburo w’impinduka nziza u Rwanda rwifuza kugeraho.
Ni ubutumwa yatanze kuri uyu wa Gatandatu ubwo yitabiraga inama nkuru ya 6 y’Urugaga rw’Abagore rushamikiye ku Muryango FPR Inkotanyi, yari ifite insanganyamatsiko igira iti “Umugore, umusingi w’umuryango.”
Mu ijambo rye atangiza iyi nama, Madamu Jeannette Kagame yavuze ko ibaye mu gihe isi ikomeje kugarizwa n’ibibazo, byiganjemo iby’umutekano muke n’izindi mpinduka zitandukanye n’izo mu bihe byashize.
Yagize ati: “Inama y’uyu munsi ije mu gihe gikomeye ariko kandi gikwiriye, kandi gifite icyo kitwibutsa. Turi mu gihe isi irimo impinduka nyinshi, aho imibanire n’imikoranire mpuzamahanga bigenda bihinduka, ibibazo by’umutekano bikiyongera mu bice bimwe na bimwe by’isi, hakiyongeraho n’imyumvire mishya igira ingaruka ku muryango n’indangagaciro ziwugize.”
Icyakora, yagaragaje ko nubwo isi iri guhura n’ibyo bibazo byose, u Rwanda rukomeje gutera imbere, anasaba abagore kugira uruhare muri urwo rugendo.
Yagize ati: “Ni igihe kandi u Rwanda rukomeje gutera imbere no kugira ijambo mu ruhando mpuzamahanga. Ibi biradusaba kongera gutekereza ku ruhare rwacu nka ba mutima w’urugo mu kubaka umuryango uhamye, kuko iterambere ry’igihugu ritangirira mu muryango, kandi umugore akaba inkingi ikomeye iwubaka ikanawukomeza.”
Madamu Jeannette Kagame yongeye gushimangira ko amahitamo u Rwanda rwakoze ashingiye ku isano y’Ubunyarwanda Abanyarwanda bafitanye.
Yagize ati: “Ubuyobozi bw’igihugu cyacu bwakoze amahitamo akomeye. Icyo nifuza kwibandaho uyu munsi ni ukubaka ubumwe, ni ukuba umwe, twese duhujwe n’isano y’Ubunyarwanda. Ubunyarwanda si ijambo gusa risobanura iyo sano, ahubwo ni intekerezo, imyitwarire n’imibanire bishingiye ku ndangagaciro z’umuco wacu n’ururimi rwacu.
Ubunyarwanda buravukanwa, ariko cyane cyane buratozwa. Aha ni ho dufite inshingano zikomeye nk’ababyeyi bahekeye u Rwanda. Ni gute dutoza abato indangagaciro z’ingenzi, tukagira imiryango yubakitse neza, kandi tukabihuza n’iterambere ryacu n’inshingano zindi?”
Aha ni ho yahereye asaba ababyeyi kuzirikana inshingano bafite zo guha abana uburere bwiza bushingiye ku muco nyarwanda.
Yagize ati: “Umwana utaratojwe indangagaciro zo gukunda igihugu, kubaha, ubumwe, ubufatanye, ubupfura, kwihesha agaciro no kwirinda kirazira n’ibindi, iyo atangiye guhura n’imico y’ahandi adafite ibyo asanganywe yatojwe, yakira ibyo ahuye na byo byose akabitwara uko biri, ntamenye gutandukanya icyiza n’ikibi.”
Madamu Jeannette Kagame kandi yasabye abanyamuryango bibumbiye mu Rugaga rw’Abagore rushamikiye ku Muryango FPR Inkotanyi gukomeza gushyira imbaraga mu kuba umusemburo w’impinduka nziza u Rwanda rwifuza kugeraho.
Yagize ati: “Nk’abagize Urugaga rw’Abagore, dukomeze kuba umusemburo w’impinduka mu mitekerereze, mu myumvire n’imikorere bigamije kwihutisha iterambere ry’imibereho myiza n’ubukungu. Gukunda no kurinda u Rwanda bikomeze kuba imibereho yacu ya buri munsi, kuko nta wundi uzabidukorera. Nta cyo igihugu kitaduhaye. Dufite amategeko aturengera n’ubuyobozi bw’igihugu buzirikana agaciro k’umugore. Ahasigaye ni ahacu.”
Iyi nama nkuru ya 6 y’Urugaga rw’Abagore rushamikiye ku Muryango FPR Inkotanyi yitabiriwe n’abarenga ibihumbi 2, barimo abagore bahagarariye abandi mu nzego zitandukanye z’uyu muryango.
Emelyne MBABAZI
RADIOTV10
