Ikipe ya Manchester United, ishobora kuzabura umunyezamu wayo wa mbere Andre Onana mu mikino igera kuri 7 ifungura umwaka wa 2024 nyuma y’uko ikipe y’Igihugu ya Cameroun ikatishije itike yo kujya mu Gikombe cya Afurika.
Ni itike Cameroun yabonye nyuma yo gutsinda u Burundi ibitego 3-0 ihita iyobora itsinda ryayo ari nako ijya mu mwanya wayo wo kuzaba iri muri Côte d’Ivoire mu mikino ya nyuma y’igikombe cya Afurika izaba hagati ya taliki 13 Mutarama igasozwa 11 Gashyantare 2024.
Andre Onana wagaragaye iminota yose muri uyu mukino n’ubundi biteganyijwe ko azagaragara mu mikino ya nyuma, nyuma y’uko yari yarasezeye imburagihe mu ikipe y’Igihugu kubera kutumvikana n’umutoza ku buryo bw’imikinire n’imikinishirize.
Cameroun nigera kure muri iki gikombe, Andre Onana biteganyijwe ko azasiba imikino 4 ya Shampiyona y’u Bwongereza Premier League izabahuza na Tottenham, Wolves, West Ham na Aston Villa.
Ashobora kuzasiba kandi imikino ibiri ya 1/2 cya Carabao Cup ndetse n’umukino umwe w’ijonjora rya 4 rya FA Cup mu gihe Manchester united yaba ikomeje muri iyi mikino.
Ku bijyanye n’imikino ya UEFA Champions League, ntakibazo kinini gihari kuko imikino yo gukuranwamo izatangira nyuma y’umukino wa nyuma w’igikombe cya Afurika icyumweru kimwe.
Mu gihe Cameroun yabasha kugera ku mukino wa nyuma, Manchester United na yo ikabasha gusohoka mu matsinda Andre Onana yazakina uwo mukino amaze iminsi 7 avuye muri Cöte d’Ivoire.
Mu gihe Onana yaba agiye, biteganyijwe ko iyi mikino yazasiba, izamu rya Manchester United ryazaba ririmo Altay Bayindir na we basinyishije mu mpeshyi avuye muri Fenerbache.
Si Andre Onana gusa United izabura kuko na Sofyan Amrabat basinyishije ku ntizanyo, biteganyijwe ko azaba ari kumwe na Maroc na yo yabonye itike yo mu Gikombe cya Afurika, hakaba kandi Amad Diallo na we uzaba ari kumwe na Côte D’Ivoire, Hannibal Mejbri na we uzaba ari kumwe na Tunisia.
Abel Deus KWIZERA
RADIOTV10
