Umuhanzi Meddy na Platini P bahataniraga ibihembo muri AFRIMA Awards 2021, bombi nta n’umwe wabonye igihembo muri iri rushanwa ryihariwe na Shanah Manjeru w’imyaka 13 waciye agahigo ko kwegukanamo ibihembo byinshi.
Mu bihembo byaraye bitangiwe mu murwa mukuru wa Nigeria, Lagos abahanzi b’Abanyarwanda ntibabashije kwitwara neza dore ko mu byiciro bari barimo byose bakubiswe inshuro bagataha amaramasa.
Icyiciro cy’umuhanzi mwiza mu karere ka Afurika y’Iburasirazuba, Meddy yari ahatanyemo n’abarimo Harmonize, Diamond Platnumz, Rayvanny n’abandi cyatwawe n’umugande, Eddy Kenzo watumye Abanya-Uganda bavuza impundu.
Ni mu gihe icyiciro Platini P yari arimo cyaraye gitwawe n’umunyakenyakazi Nikitake w’imyaka 19 watangiye umuziki ku myaka 3, akaba ari we wanegukanye igihembo cy’umuhanzikazi mwiza wo muri Afrika y’Ibburasirazuba.
Shanah Manjeru yabaye umuhanzi muto wa mbere mu mateka ya AFRIMA wegukanye igihembo, aniyongera ku rutonde rw’abandi banya Kenya barimo Sauti Sol na Nikitake bahacanye umucyo.
Urutonde rw’abegukanye ibihembo
- Umuhanzikazi mwiza uteye umuhate muri Africa yabaye Shanah Manjeru
- Umuhanzi w’umugabo mwiza muri uteye umuhate yabaye Iba One
- Umuhanzi mwiza uteye umuhate yabaye Nikita Kering
- Abahanzi bagize imibyinire myiza mu ndirimbo babaye: Flavour, Diamond Platnumz na Fally Ipupa
- Umuhanzikazi mwiza mu mpahanga (Diaspora) yabaye Naomi Achu
- Umuhanzi w’umugabo mwiza mu njyana ya ‘African Pop’ yabaye Iba One
- Itsinda ryiza ryabaye Sauti Sol
- Abahanzi bakoranye igihangano cyiza babaye Wizkid na Tems
- Umuraperi mwiza mu myandikire yabaye Elow’n
- Umuhanzikazi mwiza muri Africa y’Amajyarugu yabaye Manal Benchlikha
- Umuhanzi mwiza w’umugabo mu Mujyaruguru ya Africa yabaye Dizzy Dros
- Umuhanzi mwiza w’umugabo muri Africa y’Uburasirazuba icyiciro Meddy yari ahatanyemo yabaye Eddy Kenzo
- Umuhanzikazi mwiza muri Africa yo hagati yabaye Shan L
- Umuhanzikazi mwiza mu cyiciro cyari gihataniwe n’abarimo Rema Namakulla yabaye Nikita Kering
- Umuhanzi mwiza muri Africa yo hagati yabaye Fally Ipupa
- Umuhanzi mwiza muri Africa y’Amajyepfo yabaye Blaq Diamond
